iPhone 4呢排嘅風頭一時無兩，行貨機炒到一萬蚊一部，但係有啲美中不足喺白色版iPhone 4原本話上月底有得賣，家一拖再拖延遲到年底先開賣喎。黑莓BlackBerry就冷手執個熱煎堆，聽日首次喺200幾間嘅大型連鎖電器店，售賣佢哋第一部全QWERTY鍵盤嘅珍珠白外殼智能手機Bold 9700，黑莓變白莓食iPhone 4頭啖湯。
小妹噚日率先試用呢部白莓，部機以黑色嘅鍍鉻外框，配上仿皮白背蓋，型格十足，好啱我哋啲咁有品味嘅女仔用。RIM亞太區副總裁勞偉強同小妹講，今次為咗配合呢部新機開賣，公司一改以前同電訊商合作以綑綁式月費計劃賣機，首次喺電器零售商賣機，即係話消費者齋買機都得，售價$5,188。
機身又薄又輕
RIM產品經理陳健寧Rickeal話，黑莓變身白莓，相信會吸引更多女性購買新機，「白莓手機男女都會鍾意，當然仲方便啲女士襯衫啦」。小妹拎上手，呢部又幾輕幾好揸喎，原來機身薄到只有14.1毫米，重量都係122克。
有外在美，都要有內在美先得，Rickeal話，白莓其中一個大賣點，設有專為BlackBerry智能手機而設嘅App World，用家可以免費下載唔同應用程式，包括娛樂、社交網絡、新聞等App，當中唔少係本地化嘅App，好似有交費嘅繳費靈，飲食網OpenRice，同埋可以到國泰或港龍App查看航班資料。
