每年7、8月都好似住喺灣仔咁，日日都喺會展睇展覽，美食博覽下月12至16日又嚟，今年其中一個主題係麪食，會有專區。
韓國女學生煮麪
有參展商搞咗個韓國傳統市集（檔位1D18B1），請一班韓國女學生示範煮炸醬麪。韓劇迷都知道，韓國人對炸醬麪好有感情，生日食，結婚食，失戀都食，食到成臉醬，女人好似要識煮炸醬麪先有人要咁。街內賣嘅係made in Korea嘅PULMUONE（圃木園）韓式炸醬麪（$15），雖然相傳炸醬麪由中國山東傳去，但韓式比較香甜，炸醬較黑。
參展商話，準備超過30款正宗韓國麪食，包括顧及女性市場嘅Ottogi（不倒翁）低熱量杯麪裝韓國粉絲（$8），每杯只有120kcal。另外，去過首爾地鐵、火車站都會見整甜品「胡桃夾子」嘅機器，先加入韓國糯米麥造嘅皮，裏面包住豆沙、胡桃，即焗即食。參展商都引入咗，試食價10粒$30；唔太甜又唔滯，忍唔住食咗4個。日軍侵韓時，韓國天安市有位婆婆用家鄉產胡桃創造呢款甜品，畀流離失所嘅人感受家鄉溫暖。
想食豪啲，可以試吓鴻星嘅鮑魚撈麪，原價$108減至$78。嫌唔夠豪？可以買即食細鮑魚，3隻$99，憑場刊內的優惠券加$1多一隻。仲唔夠豪？咁試吓原價$250減到$150嘅即食大鮑魚，手掌咁大o架。鴻星集團自家製嘅XO醬、蝦乾辣油等，原價加$1多一樽。
另外，恒興行會有免費試食，新西蘭天然翡翠鮑魚粒伴奈良手打冷麪，每日限量試食100客。又可以用$1震撼價買到日本冲繩黑糖薑蜜、新西蘭鹿尾巴花果茶，但每日限量100份。
from:
http://hk.apple.nextmedia ... art_id=14285397
