森美、阮小儀噚日喺赤柱沙灘拍攝無綫節目《千奇百趣》，一班藝人仲分開男女組玩遊戲，百果園E神DaDa（陳靜）同楊秀惠都着咗比堅尼打底，DaDa雖然有着衫，但佢嘅E-cup咪咪依然蕩漾出眾，打低其他女仔。雖然書展今日已開始，但係DaDa話自己冇乜攻勢，咁啱就有無綫呢個節目可以畀佢出招。
火辣沙灘有女睇又有男人騷肌肉，一班男仔仲夾胸大跳韓文歌《Nobody》嘅舞蹈，森美笑佢哋：「未見過男人有事業線。」DaDa先同郭政鴻比拼，耍出兩招詠春，但有姿勢冇實際，唔怪得森美都話：「你似引誘人多啲。」到玩扯大纜時，DaDa烏低身出盡力最後都贏咗，搞到班男仔冇晒符，同場嘅楊秀惠就守身如玉，只係露膊頭，拍埋去真係輸晒，楊秀惠話：「年紀唔細，事業線唔夠人勁，噚日又係我26歲生日，想畀多啲成熟一面人睇。」
DaDa就話怕曬唔想騷身材，又話：「我都帶病開工，感冒菌入眼。」講到Yumi尹蓁晞率先出招，噚日去各大報館派寫真，DaDa話：「嘩！佢好有心，我都會派畀相熟傳媒，但自己未諗到點出招，唔想挑戰大會，亦唔會隨波逐流。」仲猛叫在場記者教路㖭。
from:
http://hk.apple.nextmedia.com/te ...462&art_id=14260415
