Fidelio Docking喇叭以一個木製音箱放置左右聲道。
蘋果iPhone 4一出，風頭一時無兩，水貨機炒到近兩萬蚊都咪話唔嚇人，咁受歡迎，iPhone嘅周邊產品都乘機推出巿場分一杯羮。好似Philips啱啱推咗一系列專為iPhone、iPod而設嘅Docking喇叭Fidelio。
飛利浦巿場部高級經理鄭漢平Patrick話，家唔少潮人都有部蘋果iPhone、iPod喺身，唔單止當街當巷上網聽歌，就算返到屋企都懶得開套HiFi聽，開住部機聽歌就算，所以一插即用嘅蘋果專用Docking喇叭好受落。
蘋果迷對Docking喇叭要求越嚟越高，飛利浦新推嘅Fidelio喇叭，一改喇叭箱嘅傳統四方外形，而係由人手製作嘅曲線形無縫木箱喇叭，令聲音可以喺音箱內向不同方向反射，聲音更加圓滑，而12毫米厚嘅外殼就可以有效防震同保持音質，「每日都係做到十幾個」。
入門級$799起賣
Patrick話，咪睇款喇叭得一個，其實係雙聲道設計，包括一組中距驅動器，低音夠晒澎湃，每組聲道備有一個高音喇叭。小妹即時將iPhone插入部頂級型號DS9000 Docking喇叭，出嚟嘅聲好沉實，好夠力水。問吓價，賣$4,999都唔平。Patrick笑笑口話，仲有入門級選擇，賣$799，等多啲人可以唔使淨係用耳機聽音樂。
