[球類運動] 勒邦占士直播節目公布去向

隨住保殊轉會熱火，占士會否尾隨勢成為全城熱話，不過大家好快唔使再心掛掛啦！事關據美國《ESPN》報道，「大帝」將喺香港時間聽朝喺佢哋旗下出席一個1小時嘅直播節目公布去向。尋日占士仲喺Twitter開戶口造勢，結果短短1晚已經吸引超過20萬人關注。

據《ESPN》報道，勒邦占士嘅代表日前聯絡佢哋，希望喺美國時間星期四晚9:00安排一個1小時嘅特別節目畀占士公開去向，同時希望出售呢個節目贊助權，收入撥捐兒童慈善團體。

近日「大帝」亦畀好友基斯保羅說服，喺Twitter開戶口，名為@KingJames，結果截至尋日黃昏，經已累積21萬個followers（跟隨者），只係占士喺入面只係簡單向球迷打招呼，未有洩露任何去向蛛絲馬迹。不過有消息人士更透露，隨住韋迪留效同保殊加盟，占士可能喺聽日嘅直播節目中，公布選擇加盟熱火，組成史上最強「Big 3」！