過氣情侶鍾欣桐（阿嬌）同方力申近日經常出雙入對，為新戲《出水芙蓉》宣傳，噚日阿嬌同小方連同導演劉鎮偉出席喺北京舉行嘅首映記者會，雖然噚日已經係內地宣傳之旅嘅第7日，不過阿嬌同小方仍然精神奕奕。
阿嬌同小方仲蹺住手出場，兩人以「嬌姐」同「小方哥」互稱，公然打情罵俏。劉鎮偉講到當日搵阿嬌同小方做主角原來係有因由，佢話：「其實當年我想用呢部戲去撮合佢哋，當年好多人話拍我戲嘅演員，最後結局都係分手，所以我想打破呢個宿命，撮合佢哋。」
劉鎮偉越爆越多，佢話：「阿嬌同小方一直否認緋聞，但我唔係太相信，因為佢哋喺片場拍戲特別有默契，尤其係眼神，唔係一般演員做得到，呢個眼神，我好耐之前見過一次，就係周星馳同朱茵拍《西遊記》嘅時候出現過。」阿嬌同小方俾導演玩踢爆，只係識得一味儍笑。問到阿嬌同小方拍戲時係咪特別有感覺？阿嬌笑笑口話：「我係一個專業演員，拍戲嘅時候對住小方梗係有感覺。」
至於小方，當日有報道話佢就算拍完自己戲份，都唔願離開，因為佢想陪住阿嬌？小方死撐：「因為喺片場好開心同享受，最開心係如果阿嬌唔NG，我哋好快就可以收工。」《出水芙蓉》喺內地上映撞正周星馳嘅《長江七號愛地球》，不過眾人都話對票房好有信心。
除咗劉鎮偉講起星爺，日前梁小龍接受港台《舊日的足跡》訪問，都講到星爺搵佢拍《功夫》時，質疑佢係咪打得，結果佢試戲時冇用力起腳踢星爺，星爺就已經成個跪低喎。
from:
http://hk.apple.nextmedia.com/te ...462&art_id=14204402
