百果園E神（陳靜）同22歲壽星女動漫Maggie（李曼筠）噚日喺apm出席流行天王Michael Jackson逝世一周年活動，現場除咗展出MJ figure同埋珍藏版嘅CD之外，仲有兩個fans扮演MJ，其中一個仲係只得4歲嘅內地小朋友王一鳴，佢除咗一身打扮似之外，連跳勁歌《Beat It》同《Dangerous》嘅舞步都似到足。
雖然出席MJ紀念活動，不過陳靜就話自己完全冇聽過MJ嘅歌，問起佢書展主辦單位打算封殺一眾o靚模，佢就一面委屈咁話：「我嘅寫真集唔係着住幾十件內衣影，公司又唔會教我擺pose，大會唔想影響青少年，有啲唔開心但都會尊重。」
說教意味濃到瀉，但陳靜未講完喎：「我睇雜誌見到有啲相意識真係好不良，根本唔係影人而係影個胸，我唔知係邊個嘅相，但係張相係有冰嘅。」記者問佢係咪講浸大咪神Carol（楊梓瑤）？本來話唔知邊個嘅佢就即刻話：「係，我係女仔見到佢都肉赤，我聽講佢係睇鹹書學擺pose。我唔係唔sexy，不過大家一睇就會知乜嘢叫健康，乜嘢叫賣弄喇？」
