o靚模近年都搶攻書展吸金，各自以性感招推出噴血寫真集誘宅男，去年已有團體發起禁o靚模入書展靜坐抗議。下月21日舉行的書展，主辦單位香港貿易發展局昨日表示諮詢過香港書展文化活動顧問團後，決定不接受意識不良和品味低俗的簽名活動場內舉行，周秀娜、新舊8模、浸大咪神楊梓瑤等將全部被禁足，眾o靚模佛都有火，群起狂插顧問團，舊8模成員A.Lin更叫書展收檔。
去年在書展威盡、贏盡人氣財氣的周秀娜，今年欲乘勢再在書展吸金，卻遇上主辦機構禁止她入場造勢宣傳，立即打亂周秀娜陣腳，令她激到生蝦咁跳，平日EQ甚高的她昨日也寸爆：「嗰班顧問團喺邊度走出嚟，香港啲人真係越嚟越虛偽，冇嗰樣整嗰樣。手執大平台嘅主辦商都鍾意搞小圈子。」周秀娜抗拒被評低俗，她說：「好想問顧問團嘅成員係咪兩年前評大衞像不雅嘅人又嚟出招？」
舊8模部份o靚模今年分拆兩隊少女組推出性感寫真集，但昨日卻接獲不准入書展搞簽名會，A.Lin、DaDa、Annie G.和Hailey C.一致強烈反對，A.Lin昨日勞氣地說：「有冇咁低B，佢哋係顧問團定先知團，根本未睇過我哋本書就知賣乜咩！佢哋呢樣唔得，嗰樣又話唔得，不如收檔。」Annie G.則說：「叫佢哋慳啲啦，香港越嚟越造作，我哋本書係反映妖怪心態，未出書已經見到一班妖怪。」
浸大咪神楊梓瑤（Carol）今年首推噴血寫真集，本計劃下月23日在書展會場中舉行簽名會造勢，她堅稱寫真集只賣健康性感，獲悉書展禁搞簽名會，Carol的經理人張小姐昨日回應：「品味高低係觀點與角度，Carol嘅寫真集只係賣陽光同青春氣息，佢只係想同大家分享青春回憶，絕冇意識不良。」
百果園E神陳靜雖然寫真集賣清純，但仍與其他o靚模同一命運，被禁足書展辦簽名會，她的經理人施念慈昨日說：「我哋本書冇內衣褲，冇比堅尼，但都入唔到書展宣傳，我諗陳靜幾個會有少少失望，不過都會尊重大會。」
新8模與師姐同一陣線，昨日異口同聲炮轟香港書展文化活動顧問團的決定，由加拿大返港做o靚模的Rika昨日說：「咁樣嘅決定，對我哋係好唔公平，我真係覺得香港有少少恐怖，我哋呢班少女啱啱先出道，但就咁樣俾人評我哋cheap，扼殺咗我哋啲機會，好想問番佢哋，去沙灘着比堅尼，瞓覺着睡衣都好正常。」另一成員Vibeke則說：「政府好搞唔搞，關乎冧樹嘅人命同醫療失誤又唔去理，偏偏呢啲雞毛蒜皮事就咁緊張，多此一舉，小題大做去成立顧問團，浪費納稅人啲錢。」
胡心諾（Rainbow）去年是首批在書展被隔離開簽名會，今年以師姐身份領軍5師妹組成Donut o靚模團闖書展，再出征不利，Donut o靚模團的經理人Admond昨日強烈譴責有關顧問團的安排，Admond說：「佢哋咁樣好歧視o靚模，其實推出寫真集都係賣靚賣青春，但書展顧問團就戴有色眼鏡睇佢哋，嫌佢哋低俗，呢啲批評絕對傷害佢哋呢班女仔嘅弱小心靈。」
from:
http://hk.apple.nextmedia.com/te ...462&art_id=14166988
