由陸永及C君組成的農夫，前晚處男紅館騷順利完成，兩人瞓身以多個不同造型又唱又跳，當中更演出棟篤笑寸盡港、台的天王天后，嘲笑劉德華唱歌死板無起伏十足念經，又狂寸剛剛在台灣開完騷的周杰倫，年屆30有多還打扮似足聖鬥士星矢，當中更以英文玩諧音爆粗，笑爆全場。
雖然農夫處男紅館演唱會只開一場，不過前晚兩人瞓身演出，其中陸永和C君更大玩棟篤笑寸盡港、台兩地的天王天后包括有劉德華、黎明（Leon）、鄭秀文（Sammi）及周杰倫等，辣盡火頭。甫開始兩人先辣Sammi，他們笑說：「Sammi張福音碟嘅甫士，普通歌手係唔會擺，只有AV男優先做，因為鏡頭只影下半身。仲有家連耶穌都信埋嘅Sammi，我都信奉佢。」
接着嘲華仔，C君說：「聽華仔歌好似佛歌一樣，冇起伏，首首歌差唔多。」陸永續說：「以前華仔身邊總有小朋友村姑，但近年連人類都聽唔明佢啲歌，以動物為主。我明白點解佢唔認結婚，因為佢戒掉七情六慾，蔡瀾浸溫泉都攬女，但佢就攬狒狒，大家買劉華念佛機。」
之後連剛在台灣開完騷的周董也不放過，C君寸他一身打扮：「十足聖鬥士星矢，正常智慧都唔會着成咁，30幾歲着成咁真有種，如果佢唔係咁……」此時C君和陸永做出「7」字手勢，擺明寸他儍仔。之後農夫意猶未盡再寸古巨基經常「三七」面示人，而黎明的金句則令人匪夷所思逼瘋旗下歌星，甚至取笑好友張繼聰不識避孕結果奉子成婚。
最抵死是農夫以英文諧音爆粗，他們說：「家啲人成日講最理想最正常小童高度，其實你哋明唔明我哋講乜，係Ideally normal child height。」台下觀眾一齊大聲講諧音粗口，笑爆全場。尾聲時陸永和C君不忘向父母及養母致謝，場面感人，最後「安哥」一次兩人以背心長褲出場清唱一曲完場。慶功宴時問到兩人會否擔心得罪人？陸永和C君冇有怕說：「唔怕，我哋之前已寫咗道歉信，華仔都叫我哋盡情講。」
from:
http://hk.apple.nextmedia ... art_id=14147155
