曾志偉兒子曾國祥被爆背正印女友腳踏四船，但又不忿被前女友A.Lin爆臭史，前晚他更暗寸舊愛博宣傳。心情極差的A.Lin昨日打泰拳洩憤，又嘲曾國祥四處媾女搵食。
曾國祥背正印女友偷嗒舊8模的裴殷（A.Lin）、理大校花蔡瑩瑩（Ivy）及洪天明舊愛梁郁霖（Lillian），驚覺被騙的A.Lin前日在微博自嘲笨，同晚曾國祥則暗指A.Lin放料博上位，又謂清者自清。
不過A.Lin對於曾國祥一席話唱反調，昨晚她續於微博炮轟：「起初我本來以為只是三個人的感情事，一下子變成四、五、六個人一起發生的故事，還要看見你行出來說清者自清，你知道這樣真的會傷害到人嗎？我真心相信原來你真係為搵食的。」明寸他覓食媾女。
隨後A.Lin在電話中說：「我冇諗過拍拖做宣傳，佢係欺騙我嘅感情，咪當我自己儍，佢講嘅嘢好多嘢都係包裝。」曾志偉曾指兒子揀女友如叫菜食飯，可有更多選擇，A.Lin說：「阿媽由細到大都教要珍惜食物，唔好亂食嘢，會肚痛。佢應該尊重女性。」
A.Lin除在網上宣洩外，昨午又在死黨盧頌之（DaDa）陪同下到銅鑼灣一拳館打泰拳洩憤，穿背心及短褲的A.Lin拳拳有力，其間DaDa常撩她傾偈，但A.Lin唧都唔笑。隨後兩人往滿記甜品喫糖水，A.Lin繼續苦瓜乾，只顧低頭玩iPhone。
另一邊廂，曾國祥前晚到尖沙嘴出席《前度》首映禮，撐好友陳偉霆及鍾欣桐場，散場後他與周俊偉等到砵蘭街一茶餐廳醫肚，其間他向友人吐苦水，又在食肆外煲煙和煲電話粥，他昨卻回復活躍，在微博透露玩wakeboard。
from:
http://hk.apple.nextmedia ... art_id=14111279
