iPhone Apps玩得多，簡單到好似本地Mini Game，或複雜到移植街機遊戲等，統統玩過晒，但講到將iPhone變手掣，再連接iPad對住個大芒打機，你又試過未？本地iPhone遊戲開發商MPad，佢唔單止將呢種概念實踐，更追加Multi Player，最多可6人同行；講起齊齊玩，佢仲計劃緊推出廣東麻雀同鋤大D！
記者：陳國輝
攝影：林栢鈞
iPhone扮老任手掣
iPhone同iPad可以溝來溝去，睇怕大家都無諗過！簡單講，兩機先以Wi-Fi或藍芽相認，iPhone就立即變身做遊戲手掣，而iPad就變為遊戲顯示屏。負責人Alex話，呢種玩法喺香港尚算首見，雖然唔係全球第一隻，但亦可叫做老二了！MPad–Plane設計好簡單，十足廿幾年前嘅烏蠅機，不過佢隨時玩到你同老友掟掣隻揪！過關、打大佬呢啲傳統菜式，遊戲內統統欠奉，反而置Friend於死地，呢樣先係至勝關鍵。值得一提係，當iPhone變手掣之後，除咗好似Wii咁用體感操作，更可選擇傳統Joystick，直接㩒四方向鍵玩，至於體感嘅靈敏度以及垂直橫向等方式，亦全部有得揀。
6人以上立即拖慢
小記試玩咗三款遊戲，其中MPad- Plane由啟動、連接手掣以至遊戲進行期間，基本上都無出現過窒機情況；至於手掣操控方面，我最鍾意用體感嚟控制飛行，動作流暢之餘，感覺又幾真實。但講到最正，必提Multi Player六個人一齊玩，MPad方面解釋，查實佢哋亦試過用六部或以上iPhone來進行遊戲，點知就出現拖慢畫面，佢建議玩家人數最好六人以下，並以Wi-Fi連線，效果最理想！
想試玩，記得先單撈MPad Controller程式，安裝落iPhone，然後先下載遊戲。Alex話，暫時只收取MPad Controller費用，售價0.99美元，至於需駁iPad玩嘅遊戲，則屬免費，有興趣就快啲拎部iPhone出嚟試喇！
Crossover遊戲率先玩!
MPad- Racer
玩家將以高空視點，配合體感手掣操控呢架玩具車仔，除支援多人齊齊玩，如果你技術唔夠，仲有可能衝出跑道跌死，遊戲難度相當高！
MPad- Plane
設計勁似經典嘅烏蠅機，你將以體感操控佢射殺其餘玩家，另有一高難度版本，玩家除咗要殺光畫面上嘅對手，仲要避開隕石！
MPad- Chinese Checkers
英文名未必明，查實係我細細個最鍾意玩嘅波子棋。點玩相信都唔使講，賣點係可隨時更換棋盤款色，而且可將iPhone與iPad連接對玩。
MPad- Snake
你無睇錯，佢中文名的確叫貪食蛇，但玩落同Nokia隻經典遊戲有好大分別，玩家唔單止要有咁長駁咁長，更可中途破對手，限時3分鐘！
查詢：
http://playmore.com.hk
