日前本報先至報道完房祖名自爆喺台灣宣傳嘅時候，俾雜誌影到佢半夜三更，拖咗兩名台灣辣妹返去酒店，其後祖名自辯話係因為唔想喺街邊食嘢，所以同朋友外賣返酒店食，而且只係逗留咗半個鐘。不過原來件事係有上文o架，原來祖名喺上個星期六（1日）喺台北約咗一班朋友，一共3男3女去咗睇戲，當中就有羅志祥（小豬）嘅緋聞女友李毓芬，同時間小豬就喺香港開緊騷。舊年李毓芬同小豬拍完廣告之後傳緋聞而為人熟識，而佢着起女僕裝嘅招牌裝就更加令佢成為台灣宅男嘅女神。
當日凌晨12點電影散場之後，一行6人意猶未盡去咗附近嘅餐廳醫肚，一到餐廳李毓芬就跟實房祖名坐低，仲施展渾身解數，以招牌女僕笑容向祖名放電，兩人仲細聲講大聲笑，旁若無人。不過食飽之後房祖名就俾男性朋友人拉上一部價值600萬港紙嘅勞斯萊斯離開，剩低李毓芬同班女性友人搵消遣。之後祖名去到夜店狂歡直到凌晨4點幾，嗰兩名辣妹咪就係喺呢個時候同佢一齊離開夜店囉。
