被封為「新一代台灣賤男」嘅范植偉因為喺愚人節公開同王心凌7年前拍拖嘅親密照，跟住仲唱當年只得17歲嘅王心凌唔係處女，冇得到女方嘅初夜，言論一出震驚演藝界，唔少網民仲發起要佢退出娛樂圈。范植偉日前接受台灣傳媒訪問，對於連日被外間抨擊，佢雙手抖顫掩住面話：「如果她給我機會，我願意當面跟她鞠躬道歉。」不過佢話唔會順應民意退出娛圈。
范植偉喺訪問度自爆曾經「生病」：「過去有一段時間，我要定期看心理醫生，太過壓抑卻找不到紓解的方式，整個人變得暴怒。」原來佢係患上精神障礙，本來食咗半年藥，不過藥物副作用令動作變得遲緩，搞到佢好驚所以停藥，點知反而因為衰多口惹禍，令情緒變得好緊張。
當年范植偉因為拍《車正在追》同王心凌撻着，後來有傳楊雅筑介入而分手。范植偉又忍唔住爆料：「我真的很愛她，我提分手時她想挽回，但有些事已經不可能了，決定分手時我們還抱頭痛哭，楊雅筑在事件中也是受害者，當時我跟她已經分開快兩個月了。」至於點解會公開親密照同埋唱王心凌唔係處女？范植偉好另類咁解釋話：「我要忘記她、放下她，所以主動挑起過去種種藉機認錯，我也甘心承受後果。」
from:
http://hk.apple.nextmedia ... art_id=13977050
