甄子丹前年同熊黛林主演嘅電影《葉問》叫好叫座，黃百鳴舊年立即再領軍添食續集《葉問2》，呢次仲加埋帥哥黃曉明，新片今晚首映，不過黃曉明唔嚟撐場，以後嘅宣傳活動都未必會露面，有指因為佢唔滿意戲份被刪剪，其中有場被刪的戲講述洪拳弟子杜宇航阻止其他人向葉問拜師，令身為葉問愛徒嘅黃曉明不滿。
黃百鳴噚日力撐同黃曉明合作愉快，佢喺電話度話：「冇刪到佢啲戲，以一個未拍過打戲嘅黃曉明嚟講，呢次拍《葉問2》，有咁嘅演出，表現真係接近滿分。我哋一直係好朋友，佢早前都有喺北京出席首映，不過佢嘅工作真係排到密麻麻。」
另有消息指今晚東方電影安排《葉問2》眾演員睇首映之後，緊接有派對慶祝，但已經離開咗東方電影嘅黃百鳴以個人名義喺中環搞生日派對，仲撞正《演藝界情繫玉樹關愛行動大滙演》。
黃百鳴笑言要走幾場，佢話：「我農曆生日喺3月，一向係慶祝西曆，不過自從兩年前爸爸喺我西曆生日過咗身，我先改為喺農曆慶祝，我都知聽日大家好忙，但冇所謂，邊個嚟到就嚟。」62歲嘅壽星公話唔好提年齡，因為佢覺得心境最重要，生日願望係拍多啲好戲喎！
