謝婷婷與安志杰愛得熾熱，兩人拍拖兩年已有意拉埋天窗，有說待徵詢雙方家長意思後，安志杰欲在今年聖誕節在外地搞小型派對迎娶佳人。恨嫁的婷婷昨日表示不要求收巨鑽，10元的扭蛋膠戒指也會接受。
現年32歲的安志杰與28歲的謝婷婷相戀後，他的純品性情不但贏得美人歸，最難得是婷婷的父母謝賢、狄波拉和兄長謝霆鋒都喜歡他，對於兩人想今年內拉埋天窗，謝賢和拉姑也是採開放態度，任由年輕人自己決定。婷婷早前已表明恨嫁，安志杰同樣希望盡快與女友組織家庭，故有意今年聖誕節在東南亞的小島註冊結婚。
記者昨日向安志杰求證，他說：「我哋係好想結婚，但家真係未定實日期，等時間成熟會話畀大家知。」其經理人公司中國星發言人李小姐表示：「Andy（安志杰）嚟緊會返內地演出《關雲長》，如果佢年底要同公司請假結婚係冇問題，但佢仲未正式向公司請假，如果佢真係要結婚，公司當然會恭喜佢哋啦！我相信Andy將來結咗婚，對事業都唔會有太大影響，因為佢係走實力派路線，又唔係偶像派。」
謝婷婷昨日在圓方出席美甲活動，透露下月母親節會和拉姑食飯慶祝，安志杰之前指要買花向拉姑提親，今年迎娶婷婷，豈非可在母親節乘機提親？婷婷說：「佢嗰日唔喺香港。」問她結婚計劃如何？她說：「其實平時得閒都會講，要睇工作發展決定。」婷婷若行婚禮，會在香港還是海外舉行？她說：「唔會喺香港，同屋企人食餐飯就得。」但她卻說不會在今年結婚。
問婷婷可想安志杰用巨鑽求婚？她笑說：「唔使，我一定會唔見，啲10蚊扭蛋膠戒指就得。」她表示婚禮不會大事鋪張，但媽咪狄波拉朋友多，問婷婷拉姑可接受？她說：「冇問，唔知，不過父母都好understand，知道我哋鍾意啲乜，可以商量囉。」她謂一定不會學哥哥先斬後奏，問她可是因拉姑之前為此大發雷霆？婷婷說：「佢知哥哥性格，都唔係好嬲，媽咪好開通。」
from:
http://hk.apple.nextmedia ... art_id=13957928
