[資訊分享] 觀塘$1件三文魚壽司

今日朋友約響觀塘食飯，響重建好既鱷魚恤中心門口見有人派傳單，
係一間叫「龍亭」既和風料理派既，
內容包括：
$1一件三文魚壽司（任點任叫，不限數量）4月30日到期
三種物品特價發售（每2位可叫一款）
$6火炙三文魚腩壽司/$8芝士廣島蠔手卷/$10迷你豬骨濃湯叉燒拉麵
$20coupon（食滿$200可用一張，5/5到期）

結果同朋友們膽粗粗咁上三樓食，結果竟然係間中式食肆...
然後畫左堆窗口位做日本餐。
每日食左6-8舊三文魚壽司，仲食左d set之類，每人$70落樓，但都好飽吓。
唔算非常好食，但又唔覺得難食。重點係唔駛等位，位置又近地鐵站。

鱷魚恤中心其實響地鐵站月台往油麻地線都望到，就響觀塘廣場o個邊，
我地成晚都響度望住個月台d人行來行去，好得意！
（因為三樓既高度同地鐵月台高度其實幾接近，可以水平咁望埋去！）

如果想去試試既記得響地面入，否則會撞唔到派coupon既人，
因為呢座中心同apm係連接的，所以食完去搭車都幾方便o架！。