撻著旅行社東主　新咪神高海寧車廂攬啜[忽然一周]

「咪神」徐淑敏收山嫁人，而自詡擁有34D天然胸的高海寧，即攝位成為「新咪神」，憑住肯搏肯捱肯晒胸的進取性格，深得監製重用，商場騷亦長接長有。坦言事業為重冇拖拍的她，原來講一套做一套，其實早已名花有主，男友是身兼旅行社老闆及籃球隊隊員的六呎三精壯男Andy丘，新咪神果然識食
3月24日晚，記者發現高海寧出席完活動急趕會男友，兩人屈在車廂摸黑談心。情到濃時，她更做主動「撻㷫」男友，在車廂內「互有攻守」之下攬啜10分鐘。
今次高海寧以為嗒到好嘢，但據知其男友一向勁多女仔埋身，在其facebook亦不乏袒胸攬女照，難怪高海寧阿媽見到這位「花弗男」照片，好擔心：「我驚個女蝕底呀！」

高海寧和男友Andy嘆完消夜離開，其間高顯得相當避忌，戴上口罩，更不時頭耷耷。

3月24日晚上10時左右，記者發現剛出席完活動的高海寧連妝都未落，就趕到旺角培正中學停車場會合男友，登上對方的凌志Harrier四驅車，之後二人與數位高大男子一同到勝利道茶餐廳消夜。當時濃妝艷抹的高海寧為免被食客認出，幾乎全程戴口罩，只是進食時才脫下，相當避忌。
凌晨12時許，其他友人先後離去，高海寧登上男友座駕，駛到女方所住的何文田寓所附近一僻靜小路。現場所見，起初兩人在車內只是談心，不久高海寧突然主動將身挨近對方，又多次在對方耳邊講話，未幾她索性胸壓對方施展啜功。此時被連番「撻㷫」的男友亦忍唔住反客為主，一手推高海寧埋窗邊，自己隨即俯身趨前，摸黑纏綿數分鐘。不過兩人最後都壓抑着慾火，男友最後送高海寧返家後便乖乖駕車離開。

3月24日晚近12時，高海寧與Andy並排坐在茶餐廳卡位，脫下口罩進食時，還與Andy的三個男友人傾得相當投契，看來彼此已不是第一次見面。

生擒狼啜
高之後主動出擊，先輕吻Andy的臉，再與Andy嘴對嘴，二人在車廂濕吻歷時十多秒。

Andy被高海寧主動撩㷫，終按捺不住，一手將高推埋車窗，更將下半身壓向對方，繼續摸黑纏綿。
二人最終安份守己，高海寧還幫男友揼骨鬆頸，又捉實男友雙手chok幾下，Andy咩火都消晒！

見埋男方家長
據消息透露，高海寧的男友丘至剛（Andy），年約30歲，98年在香港培正中學畢業，之後到加拿大「York University」大學就讀數學系。大學畢業後，他於父親所開設的「東南西北旅遊有限公司」工作。
Andy 和高海寧撻着僅數個月，但發展神速。早於兩個月前，高海寧已見過男方家長，「佢哋幾個月前喺一個朋友敍會度認識。高海寧一向鍾意高大男仔，Andy咁高又玩得，啱晒高海寧啦。加上Andy做過兼職模特兒，一齊有共同話題，Andy好快就拖住高海寧出嚟見朋友，仲帶佢見埋家長㖭，反而高海寧就仲未肯帶Andy返去見阿媽。」一知情人士透露：「雖然佢哋係熱戀階段，但其實Andy都幾花弗o架，有好多女埋身，高海寧都知o架，所以一冇job就會約Andy，绩實男友囉！」3月28日，記者就拍得Andy帶高海寧到深井海韻花園寓所見家長，其間還遊車河到屯門黃金海岸沙灘拍拖。

「高大男仔有安全感」
上周二（3月30日），記者趁高海寧出席活動，追問她拍拖一事。最初她矢口否認，但得悉被拍得上男方屋企，她才笑笑口說：「幾時呀？唔記得喇……我依家冇拍拖呀，應該係朋友食飯啫。我成日會約番以前讀書嘅同學食飯o架！」記者開宗明義表示拍得她與Andy在車廂內纏綿十分鐘，高海寧即尷尬非常，還衝口而出：「乜有十分鐘咁耐咩？應該係say goodbye啫……應該睇錯喇！」
問她是否等待感情成熟才公布，她即扯開話題：「我依家只係想多啲嘢做，搵多啲錢，買樓俾媽咪住，想買架車㖭。我細佬仲細，要照顧埋佢，我擔子好重o架！（佢係旅行社老闆，可以照顧你！）我哋朋友啫，總之識咗好耐o架喇！（Andy係咪你嘅擇偶對象？）吓，好難答喎！（你揀男朋友要高大威猛同事業型？）哈，都係o架，高大嘅男仔令我覺得有安全感！（有冇俾媽咪過目？）如果真係拍拖，會俾媽咪見吓，因為佢人生經歷豐富啲！」高海寧口口聲聲否認拍拖，不過一提Andy就笑不攏嘴，即使其後問到男友facebook內有攬女照，她都表示不會過問。

一向進取的高海寧成為「新咪神」後，除了拍電影《72家租客》和《美麗密令》，又拍無綫新劇《讀心神探》，最近蘇師傅主持的《民峰學院》（圖），她亦有份參與。
男友回應講大話
本周三（7日），記者再到Andy的旅行社，他對記者追訪顯得頗愕然，對於與高海寧拍拖及車廂纏綿的提問，一直擘大眼講大話，表示：「冇呢回事！（識高海寧幾耐？）識咗一陣啦……朋友囉！（有冇見過佢媽咪？）朋友唔需要見屋企人！（但係高海寧媽咪話驚佢個女蝕底俾你喎。）……冇呢回事！」Andy隨即急急腳離去。
兩人看似夾晒口供否認戀情，但高海寧答「識咗好耐」，Andy就話「識咗一陣」，明顯露出馬腳。

年輕旅行社老闆
Andy每天均要在位於旺角萬利商業大廈的「東南西北旅遊有限公司」坐鎮。該店舖已有三十七年歷史，專為旅客預訂機票、旅遊套票、郵輪以及代辦簽證等旅遊服務。根據公司登記資料顯示，Andy（丘至剛）佔股份3成，其餘7成則歸於其父丘沛民。
日前，記者以客人身份到過旅行社，先被職員安排到會議室傾談，而本來坐在私人辦公室的Andy，突然走出舖面，邊幫手接聽電話，邊處理文件，與其他員工無異。
而該旅行社員工按記者要求提供相關資料，介紹優惠套票，價錢亦算合理。記者笑問職員：「我朋友識丘老闆，會唔會平啲？」該名職員表示：「已經係最優惠，我哋明碼實價o架！」


Andy深得不少女性歡心，其facebook一輯遊船河的照片中，他興奮自摸胸部，另一張兩位異性幫他解褲頭，動作相當不雅。

1:30pm
上周日Andy毋須開工，他駕車到何文田接高海寧後，先到尖沙嘴K-11商場行街。當日兩人的打扮都甚為休閒輕便，高海寧雖然收起巨咪，但就穿短牛騷長腿。

之後Andy帶高海寧抵達男方與父母同住位於深井約值300萬的海韻花園。逗留一會後，再到屯門黃金海岸漫步。

高海寧在黃金海岸麥當勞買雪糕當街食。閒逛一輪後，就與Andy返回深井，相信是與Andy家人共晉晚膳。

10:30pm
在男方家中逗留4個多小時後，高海寧才與Andy一同步出海韻花園。當時高海寧離奇換上一件加大碼黑色運動外套，應該係着咗Andy件衫。

高母擔心：驚個女蝕底呀！
高海寧家境複雜，兒時父母離異，她跟母親和後父在旺角唐樓居住，其母則擺街檔賣潮流首飾。日前本刊記者到旺角女人街找到正在開檔的高母，就女兒拍拖一事，起初她語氣十分堅定地代為否認。

高母：我個女唔會拍拖嘅，朋友啫！咁每個人除咗同事都要有朋友o架！
記者：點解咁肯定個女一定唔會拍拖？
高母：佢應承過我，依家工作行先，唔會拍拖，所以呢個人一定唔係佢男朋友！唔通自己個女都唔信咩？
記者：我哋影到個男仔同高海寧喺車度又攬又錫，又搵到佢攬住其他女仔嘅相，驚唔驚佢會花心？（遞上相片）
高母：（緊張伸手接過相片低頭細看了數秒）驚！梗係驚啦！啲男人個個都鍾意靚女仔o架啦，我驚個女蝕底呀，返屋企一定會話吓佢，好多謝你哋話我知呢件事呀！

高母看過記者帶來Andy facebook內的攬女和自摸照後，先皺一皺眉，表示男人個個鍾意靚女，所以驚自己個女會蝕底。

高母打扮潮爆，08年高海寧選港姐時，高母亦有陪伴女兒現身。

記者分別問過高海寧和Andy，但兩人好似夾過口供咁，一齊講大話，點都唔認拍拖。學足阿Sa鄭中基嘅「風範」。

本周三（4月7日），記者到Andy的旅行社門外等候，原本正講電話的他，禮貌地收線。不過對於所有有相為證的事，他都以「冇呢回事」作回應。

上周二（3月30日），高海寧出席活動時被問到正在蜜運，她堅稱冇拍拖，但說到Andy就一直甜笑，更坦言自己喜愛高大男仔。

巨咪上位路
原名沈江莉的高海寧，06年參加Elite模特兒大賽，08年再以高海寧之名出戰港姐，之後被爆求學時期無心向學，中七由聖公會馬利亞堂莫慶堯中學，轉到新法書院。在密集式騷胸之下，終於成功上位做「新咪神」。

騷咪變熱門

08年21歲參選港姐的高海寧，初段走勢平平，不過自從在特備節目《港姐面試實錄》中着三點式晒逼爆上圍後，頓時成為熱門。

咪大自然招風，高海寧先後被揭改名和扮富貴，在港姐決賽兩星期前，更被雜誌刊登一輯入行前的裸照，當時她半裸上身，只用乳貼遮胸，相當大膽。

象鼻頂胸

落選後，高海寧風雨不改地晒胸，去年9月到泰國拍攝《美女廚房》特別版時一招象鼻頂胸將「事業線」逼出驚人效果，鋒頭一時無兩。

陳法拉封胸，徐淑敏嫁人，高海寧接棒成為「新咪神」，今年除了拍住梁政珏成為「晶女郎」有戲拍外，更試過一星期出騷四次，騷價由入行的五千，三級跳升至萬五。