原名梁幗馨的狄娜病逝後翌日，其子馬天如（Michael）委託好友代為出席記者會公佈母親的死訊，但未有交代如何處理亡母後事，只強調不會有任何公開殯殮儀式。記者昨日致電狄娜私人助理伍小姐（Candice），對於有報道指狄娜將長眠於安葬了不少內地政要的深圳大鵬灣墓園，Candice否認說：「應該唔會，成數唔高，以我對佢（狄娜）嘅認識，佢好怕蛇蟲鼠蟻，好愛乾淨，所以應該會按佢生前意願進行火葬，但一切要視乎佢家人嘅意願。」
雖然Candice表示狄娜家人還未決定如何安排其後事，但據悉狄娜將會在柴灣歌連臣角火葬場火化，骨灰也會安放在香港。記者問到馬天如會否為狄娜低調舉殯及會採用甚麼宗教儀式時，Candice說：「應該會（舉殯），但一切未決定。因為呢幾日係公眾假期，都要辦咗死亡證先。至於宗教問題，都有唔少人問過，梁小姐（狄娜原名梁幗馨）話佢讀書時係讀天主教學校，所以改咗個英文名叫Christine，但佢媽媽拜佛，佢又跟佢媽媽拜佛拜觀音，所以佢其實都冇乜特定宗教信仰。」
再問到家人是否已為狄娜選定遺照時，Candice說：「佢自己已經揀咗，但邊張我就唔清楚。」狄娜曾在遺言中表示不想大家看到她死後的木無表情，只想大家記得她生前的談笑風生，故相信她親自揀選的遺照，也會展露其燦爛笑容及充滿自信的一面。
Candice又表示狄娜彌留時很安詳，兒子Michael及其女友均在身邊。對於有消息指Michael稍後將舉行記者會交代母親後事，Candice說：「早兩日我同佢（Michael）食飯，冇聽過佢講呢件事。」Michael此刻心情如何？Candice說：「肯定唔好，始終唯一嘅媽媽唔喺度，始終係佢至親。」Michael有否痛哭？她說：「有，一定有！不論男仔女仔，睇到電視播出媽媽講嘢嘅片段，但媽媽原來已經唔喺身邊，佢都係有血有肉嘅人，點會唔難過。」
有指Michael將繼承狄娜過億遺產，以及會保留狄娜在葡萄牙佔地30多萬呎的豪華大宅馨園，Candice說：「係咪保留馨園，佢冇同我講，始終呢啲係身外物，佢心痛嘅係佢媽咪。至於遺產嘅問題，我真係唔知，梁小姐留低嘅嘢畀晒個仔亦好正常。」Candice又謂感激傳媒愛錫狄娜，深信她在天之靈會感到安慰。
此外，Candice日前接受傳媒訪問時，透露狄娜入院後很瘦，為不想親朋擔心，故決定不讓朋友到養和醫院探望，只有兩位娛樂圈中藝人例外，但她表示不便透露兩人的身份。Candice又指狄娜生前曾表示生死由天，不會追求長命百歲，認為做人活得不夠積極的話，縱使有二千歲命也是徒然。據悉狄娜生前與資深歌手Christine Samson私交甚篤，記者昨日致電Christine問到她有否到醫院探望過狄娜時，她說：「我冇去醫院，只係個幾星期前同佢通過電話，因為佢唔想大家擔心，所以唔想我哋去探佢。我同佢通電話嗰陣，佢已經喺醫院，但佢把聲仲好strong，意志好強，當時我仲叫佢快啲好番，之後一齊出去食飯唱歌。」
http://hk.apple.nextmedia ... art_id=13893236
