暑期未到，寫真戰已預告開幕。周秀娜之前透露在寫真集玩滴蠟滴汗，Angelababy昨日也宣佈將在告別寫真集中，終極性感，更不介意裸露上陣。日前被老公陳奕迅爆入院的徐濠縈，病癒現身，她揚言食物中毒連屙20次，比生女更辛苦。
人氣女模Angelababy、Jessica C.和周麗淇等，昨日在尖沙嘴出席日本品牌Duras Ambient新店開幕。Angelababy透露下月出發到外地，拍攝寫真，更公佈是寫真告別作，她說：「應該係呢幾年最後一本，下年唔再出，今年我有好強勁嘅班底。」
Baby表示會終極性感，至於會否裸露？她說：「靚，而又唔係sell性感嘅話，我會接受。」為可出告別寫真，因為黃曉明不准？她說：「唔係，我下年會主力拍電影。」提到兩人關係似乎開始明朗化，她說：「冇呀，係朋友。」
談到Sa基離婚，有傳鄭中基洗去愛的紋身，Baby和陳偉霆在肚位都有十字紋身，Baby即時否認是愛的紋身，她說：「唔係愛的紋身，嗰時貪靚，仲有諗過大肚嘅話，個十字咪變形，咁要紋啲裝飾落去。我唔會後悔，都唔會去洗。」她謂將來結婚，才會考慮再紋丈夫的名字。
此外，陳奕迅（Eason）之前在演唱會透露老婆徐濠縈入院，徐濠縈昨日也有現身活動，她透露懷疑食物中毒，她說：「我3個鐘頭屙咗20次，生仔都冇咁辛苦，應該係食物中毒，朋友車我去醫院打止痛針，因為Eason瞓緊覺。」問她可是在日本錯吃不潔食物？她說：「唔係，係食消夜，仲同Eason、Wyman一齊食，得我有事，我痛到死屍咁，郁唔到，個女嚇到勁喊。」
對於Eason在演唱會點唱《天佑愛人》給她，非常sweet，但徐濠縈就不大受落，她說：「佢晚晚都唱o架啦，我只係幾萬人嘅其中一個。」
