相戀6年嘅蔡卓妍（阿Sa）同鄭中基日前被爆已婚，消息一出兩人即高調宣佈已分手幾個月，雖然之後兩人都各自出席公開活動，但對已婚一事就從未正面回答，噚日阿Sa喺上海做電影宣傳時，更寫了一句密令「希望他能夠盡快找到一個好的女朋友」，好似向舊愛祝福，但阿Sa卻辯稱「他」係指爸爸。
噚日阿Sa聯同導演王晶、陳偉霆等到上海宣傳新片《美麗密令》，阿Sa成為全場焦點，雖然阿Sa對傳媒嘅問題都表現合作，但因為電影公司嘅工作人員擋駕話只可以問關於電影嘅問題，令現場氣氛尷尬。之後阿Sa喺玩遊戲環節時就語帶雙關寫咗一個「密令」，就係「希望他能夠盡快找到一個好的女朋友。」雖然阿Sa強調話係寫畀爸爸，但大家就覺得佢所指其實係舊愛鄭中基，搞到阿Sa急急解釋：「爸爸是一個非常不懂得照顧自己的人，希望他找到一個合適的人，如果我身邊有合適的人也會幫他留意。」
