自從劉德華同朱麗倩上年俾本報踢爆08年喺美國拉斯維加斯秘密註冊結婚之後，藝人結婚已經冇得好似以前咁神不知鬼不覺。馮仁昭噚日收到可靠消息，話38歲嘅鄭中基（Ronald）同27歲嘅蔡卓妍（阿Sa）呢一對，原來06年1月30日已經喺洛杉磯註冊，即係仲早過劉華同黎明！
翻查資料，原來當時的確有傳Ronald同阿Sa秘密飛咗去美國幽會，仲話Ronald帶埋老竇鄭東漢飛去美國探阿媽同細妹，又邀請阿Sa同Sa媽安排見面，時間上兩件事又真係好夾，一家大細咁大棚人喺晒美國，真係要舉行人生大事亦唔出奇。
Ronald同阿Sa喺04年拍攝電影《追擊8月15》嗰陣時日對夜對，終於擦出愛火，05年仲俾我哋撞破阿Sa漏夜到訪男友深水灣道大宅度春宵！
仲記得06年頭無綫舉行嘅《勁歌頒獎禮》，Ronald憑《無賴》爆冷奪得金曲金獎，劉華仲整蠱佢同阿Sa，狂叫佢哋結婚，當時Ronald死口話「我冇結婚」，家睇番佢咁大反應，算唔算係此地無銀呢？事到如今，突然有人爆佢兩個其實06年已經結咗婚，今次唔知佢哋又認唔認呢？
from:
http://hk.apple.nextmedia.com/te ...462&art_id=13828216
