鄭中基（Ronald）孭飛嘅新戲《越光寶盒》前晚喺圓方舉行首映禮，唔少演員好似方力申、鄧麗欣、梁詠琪同蔡少芬（Ada）都有出席，個個都盛裝現身。之前有雜誌影到Ada着闊身衫好似有喜，但當晚佢就着貼身露背裝亮相，擺明以行動打破傳言，佢話：「唔係有BB，不過有努力過造人，但呢啲可遇不可求，唔係想就得。老公（張晉）近日返咗內地拍劇，冇乜時間見面，所以造人計劃都要押後。」
不過Ada就話可能之前喺內地做嘢，早睡早起生活有規律，所以搞到肥咗少少，惹嚟美麗嘅誤會，但係會唔會為造人之前做好身體調理呢？Ada話：「其實係唔係都要好好保養身體，唔好摧殘自己。」Ada話若果有一日真係有BB，佢一定會同大家分享開心，唔會神神秘秘。至於好姊妹黎姿真係造人成功，Ada話：「梗係戥佢開心，但其他佢嘅嘢我就唔方便講，總之多謝大家關心佢，佢家好開心好健康。」咁黎姿係咪懷孖胎？Ada笑笑口話記者仲知得多過佢喎！
