麥浚龍（Juno）早排同貌似胡杏兒嘅日本AV女優蒼井空合演何超儀新片《剖術者》，蒼井空其後義助Juno新歌《超生培慾》MV做女主角，MV日前喺網上流出。
MV講述Juno童年受到媽媽疼愛，媽咪成日都用手摸佢塊面，點知好景不常，媽咪竟然喺個仔面前吊頸自殺，令Juno留下童年陰影，長大後變成變態戀物狂，迷戀人嘅肢體，特別係手部，所以MV中佢為蒼井空打針，迷暈佢之後綁住佢，其後又剝佢啲衫，令蒼井空出現裸背鏡頭，最後Juno仲切埋蒼井空隻手，不過只係鏡頭交代。
支持Twins復合
雖則呢次蒼井空收埋36G上圍，只係露背，有網友踢爆Juno嘅MV大橋涉抄林俊傑07年《殺手》MV，故事講佢係沉迷女性美腿嘅變態小說家，生擒少女肢解，不過Juno改頭換面嘅手法高明，仲拍得相當唯美。
噚日Juno又有出位搞作，身為服裝代言人嘅佢喺銅鑼灣於四層樓高游繩為巨型廣告揭幕，提到Twins復合開演唱會，仲話如有時間一定支持，但唔會包場睇。
