周杰倫呢排是非纏身，台灣奀星吳佩珊自爆16歲初夜獻咗畀佢，搞到周杰倫周身蟻，蔡依林（Jolin）近日被傳翻撻周杰倫，今年1月仲被撞到兩個相約碌齡，Jolin噚日喺台灣拍廣告，焗住回應有關舊愛啲嘢。
Jolin當年同周杰倫緋聞傳足5年，有消息話Jolin同樣將初夜獻咗畀對方，記者含蓄問周杰倫係咪佢第一個男人，Jolin諗都唔諗就話：「不是。」記者解釋第一個男人唔係指初戀男友，而係指初夜男友，Jolin就嬌嗔咁話：「你們很無聊耶！」
Jolin兩個月前同周杰倫碌齡，但當時男方見有狗仔隊追訪就速速鬆人，被撇低嘅Jolin話唔介意：「因為我在比賽，不想離開我朋友。」
奀星繼續講初戀
相反周杰倫雖然被爆私隱，但佢一於好少理，有網友爆料話日前周杰倫喺台灣一間玩具店拍MV，當時佢仲扮蜘蛛俠喎！至於憑周杰倫緋聞人氣急升嘅奀星吳佩珊，佢噚日喺台灣上中視節目《金曲超級星》，佢嘅表現唔錯，得分好高，似乎有運行，佢都知道日後話題會離唔開周杰倫，佢仲繼續話好回味呢段初戀，佢話：「因為是一段美好回憶，但我還是希望每個人都很好，也祝福他，但也對他及粉絲道歉，因無心引起波瀾。」
