苟芸慧、阮小儀、徐子珊、沈卓盈、黃宗澤同王祖藍等，噚日喺海洋公園宣傳無綫劇集《情人眼裏高一D》，幾對劇中嘅情侶仲玩傳遞愛意嘅遊戲同跳彈床，佢哋要面貼面及嘴對嘴傳心形卡紙，苟芸慧即刻成為所有男演員爭相合作嘅對象，就連花旦級嘅徐子珊都一度被冷落。
最後俾王祖藍爭贏咗，可以用嘴對嘴嘅方式同苟芸慧玩傳卡紙。事後苟芸慧話為咗劇集宣傳，都玩得好開心，問佢拍劇時係咪都會咁樣，佢話：「咁玩大家先會有氣氛，我唔係太介意，不過初初真係有少少唔慣。」
苟芸慧話喺劇入面會同黃宗澤、王祖藍有接吻戲，佢話原來王祖藍嘅咀感好好，女主角徐子珊雖然被搶鏡，但佢就話一啲都唔介意，仲話：「正常o架，喺劇入面佢同阮小儀都一樣搶手。」
宗澤唔怕杏兒呷醋
此外，黃宗澤喺咀功方面輸畀祖藍，但佢話輸得心服口服，因為祖藍個嘴唇又厚又軟。宗澤又讚阮小儀好咀過苟芸慧，即使同女友胡杏兒相比，佢都話阮小儀最好咀。問佢擔唔擔心杏兒嬲？佢話：「驚咩呀，冇有怕。」
