康哥話元氣壽司首次推出新年外賣派對套餐，方便市民。
就嚟係虎年，人稱康哥嘅元氣壽司營運總監葉育康有啲計，首次推出新年外賣派對套餐，佢仲破天荒派人送上門，即日起開始訂購，10號前預訂有九折，「啲人新年打麻雀邊個肯起身出去買外賣，送埋上門方便啲。」
炸芝士年糕似心太軟
康哥又話，為咗應節，元氣首次推出新派日式炸芝士年糕，將年糕包住芝士炸熱食，口感好似心太軟。日本傳統年糕造法先將糯米蒸熟，放入木桶用木樁舂成糊狀，就用手拎嚟食，連住一絲絲代表長命百歲，「市民都可以喺超市買乾咗水嘅日本糯米團，拎返屋企放入焗爐或烤爐燒至微香，再夾紫菜或跟麪豉湯食。」
全新嘅筋子壽司寓意百子千孫，筋子一樣係三文魚嘅魚子，但佢屬初成形嘅魚子，有薄膜成梳包住，味道比一般魚子更鮮又唔鹹，「一條三文魚只得兩梳筋子，成串咁，代表兒孫滿堂。」
如果您喜歡這篇文章，請按「讚」或分享給您的朋友，以示鼓勵。
