予人乖乖女形象的苟芸慧，近期升呢做「氣質咪神」，直言以事業為重的她，不急於拍拖，還表示揀男友講心唔講金。
應屆中華小姐冠軍苟芸慧（Christine），出道短短日子已獲無綫力捧，首次拍劇擔正做女主角，與王祖藍、黃宗澤主演新劇《情人眼裏高一D》，同時更獲不少品牌垂青，以性感姿態出席公開場合，令人眼前一亮。由於她本身擁有獨特氣質，加上34C豐滿上圍，即獲封「氣質咪神」。
Christine對此說：「其實初時我唔明呢個名點解，因為中文唔叻，後來記者解釋畀我聽，有人讚梗係開心，不過都幾尷尬，其實我最希望大家多啲留意我嘅工作。」外表甜美的Christine去年隻身由多倫多來港選美，她直言起初也感孤單，現已開始適應香港生活，問她可有男士追求？她說：「冇呀，呢排工作都好忙，好少有機會去街。（男仔會主動識你？）其實我好怕醜，就算有男仔主動識我，我多數都唔出聲，搞到對方好冇癮。」
談到過往情史，Christine表示拍過三次拖，最長一段長達四年，她說：「當時我喺多倫多生活，同一個外籍男友拍拖四年，但媽咪一直唔係好鍾意佢，因為佢覺得始終大家文化唔同，大家諗法成日都有衝突，我夾喺中間好辛苦，但父母對我嚟講係最重要，所以同佢分咗手。」
對於近期選美出身的徐子珊和林莉分別傳出突然富貴，有傳有富豪「照顧」，她說：「唔一定係富豪就啱自己，最重要大家諗法一致，心地一定要好，要愛惜我，呢啲要講緣分，順其自然。」
