現年31歲嘅大馬女歌手梁靜茹，噚日下晝同大佢3年嘅圈外男友趙元同（Tony）喺菲律賓長灘島Discovery Shores Hotel舉行沙灘婚禮，一對新人3月3日再喺台北請飲。
噚日婚禮現場佈置得好浪漫，着住Vera Wang設計價值百萬新台幣嫁衣嘅梁靜茹，由證婚人李宗盛拖住進場，新娘子一踏入婚禮場地，即刻忍唔住變淚人，新郎都係咁除眼鏡抹眼淚，交換戒指儀式後，梁靜茹宣誓時又同老公講：「謝謝你愛我，謝謝你讓我成為更好的人。」
李宗盛親手送嫁
當牧師宣佈新人成為正式夫妻，佢哋又變咗接吻魚錫唔停，親友都受呢幕感動到眼濕濕，梁靜茹等禮成之後話：「真的太感動了！」Tony再補充：「她一哭，我就忍不住哭了，很謝謝她後半輩子願意陪着我。」
李宗盛見證梁靜茹出嫁，佢話：「我是在她17歲時帶她進這行的第一個男人，今天親手把她交給她生命中第二個男人。」
帶埋男友嚟嘅伴娘戴佩妮自爆有結婚衝動，佢話：「其實我們交往就是以結婚為前提，今年太多人結婚，不想趕潮流。如果他突然衝動求婚也很難說，結婚需要衝動。」
梁靜茹舊愛、五月天成員瑪莎噚日雖然冇去觀禮，但就送上祝福，佢話收到女方3月婚宴請帖，仲話得閒會出席喎。
