播完2年嘅日劇《交響情人夢》，令官仔骨骨嘅千秋王子玉木宏，儲落唔少港女fans，上週五（15日），王子終於駕到，一出機場30個全女班fans即用日文大嗌：「我愛你！」冧死王子。
留港3日，玉木宏除上《勁歌》總選撐TVB，主要任務係冧吓班港女fans，幫3月喺九展開嘅處男香港騷造勢。
不過自上年為電影《MW毒氣風暴》演奸角，自動波節食減咗15磅，家陣更愈來愈瘦，連樣都殘晒，30歲王子變人乾，真係陰功豬！
04年先進軍樂壇嘅玉木宏，至今出過9張細碟同3張大碟，大熱作〈Slow Time〉曾打入Oricon銷量榜第7位，聲線同木村相似，都係走冧死女嘅柔情路線。
上週五（15日）王子玉木宏駕臨香港，來港3日，上完《勁歌》頒獎兼表演後，戲肉係週日（17日）出席於荷里活廣場舉行嘅fans見面會，當日過千fans到場尖叫潮拜，還用廣東話唱生日歌慶祝偶像30歲生日，被fans氹得開心，王子即出招冧fans：「香港有好多靚女！」還承諾：「3月嘅演唱會，我會同每個fans握手！」全場女粉絲即用日文大叫：「我愛你！」回敬。
減肥上癮
但記者所見，一向瘦蜢蜢嘅王子，今次來港瘦成個碼，原來上年為電影《MW毒氣風暴》中飾演的冷血殺手睇落更邪惡，一接劇本即地獄式減磅，狂做gym，仲戒飯同澱粉質，由155磅減到140磅，睇落似藤條。
5 呎11吋高、只得140磅其實偏瘦，去年頭拍完《MW》，即趕拍嚟緊3月喺香港上畫嘅《交響情人夢》電影版，同時間又孭住5個廣告，加上籌備今年嘅亞洲巡迴演唱會，每日只瞓得5粒鐘，唔捱殘就奇。更有傳玉木宏因減肥減上癮，一直日日節食，最瘦時期得番130磅，卒之又乾又瘦。
慶生露骨
上週四（14日）係玉木宏30歲生日。週日現身fans見面會，大會準備一個結他形蛋糕為他慶祝生日，仲有全場fans即場唱生日歌，王子笑住講完多謝後低身吹蠟燭，隱約可見胸骨。
到港當日雖然班港女fans熱情送花，但起初玉木宏都係冇乜表情，好鬼cool。
王子有禮
上週六晚，玉木宏上《勁歌》獻唱首本名曲〈Slow Time〉兼頒「最受歡迎新人獎」，睇佢頒金獎畀徐子珊時，唔只握手仲鞠埋躬，王子好有禮。
唔認女友
又高又瘦又靚仔自然引死女，出道12年的玉木宏，女友一直車輪轉，上年頭就被影到跟20歲新紮女星吉高由里子孖住行街拍拖。雖然斷正，但最近被日本傳媒追問幾時拉埋天窗，王子竟然死口唔認：「我一直都冇話有女朋友，我同由里子只係拍劇而結識嘅好朋友。」港女仲有行喎！
4年前拍電視劇《交響情人夢》時，千秋王子玉木宏仲精神飽滿，鬼咁靚仔。家陣拍電影版就瘦到塊面凹晒，個樣好謝。
日劇版千秋王子進軍完維也納後，電影版再為音樂理想進攻巴黎，今次千秋王子更被名模山田優（右圖）狂追，又有女黐身，難怪野田妹上野樹里發晒癲。
3級新歡
09年1月，玉木宏與吉高由里子拍日劇《愛．洗牌》時，被影到行街拍拖，但一發現記者即彈，等女友溜後跟尾，冇風度啫！
吉高由里子
前年未同玉木宏黐埋嘅吉高由里子，曾於三級cult片《蛇與舌》中大膽裸露兼玩SM。咁搏，抵佢當年贏得日本奧斯卡之稱嘅藍絲帶獎「最佳新人」。
