精通命理的堪輿師李丞責，原來曾運用術數贏3T，中獎本是開心事，但300多萬的彩金卻成為兄弟反目的導火線，同為風水師的胞弟李星瑭不但爆料力指李丞責獨吞彩金，他昨日更把行動升級，力斥李丞責言行粗魯，待人凉薄，不顧別人感受，兩兄弟已斷絕聯絡4年。
堪輿師李丞責雖能為藝人提供催吉避凶方法，但他卻能醫不自醫，他的家宅近日不寧，同為風水師的胞弟李星瑭，日前數臭李丞責01年獨吞300多萬以術數「演禽術」貼中的3T彩金，有指僅分13萬給負責出錢落注的母親和8萬元給李星瑭，兄弟因此反目。
李丞責昨日接受本報電話訪問時反應激動，他直言家醜不應外傳，並說：「佢不仁，唔代表我要不義，我點都要維護家人。」李丞責又稱不時會用術數貼中3T，但卻從未與人合資下注，他說：「落注嗰幾千蚊，我從來冇需要同人夾份，就算我贏錢都冇必要同人哋分。而且我落注總會將彩票影印低，特別中獎更值得留念。我最唔明呢件中獎事件明明發生喺01年，點解家先拎嚟講。」
對於李星瑭力斥李丞責為人凉薄，對近年患上老人癡呆症的年邁母親照顧不周，未盡孝道，原本承諾接母親入住大埔淺月灣獨立屋，最終未有兌現。李丞責聽後即反擊：「孝唔孝順，應該由阿媽親口講。」據知李丞責兄弟不和消息傳出，他非常擔心母親看到報道心情受影響，他立即抽空往探訪，李母昨日在電話稱讚李丞責：「佢點解唔孝順？佢對我好好，我好開心，佢冇難為我。」
李丞責當年留李星瑭在公司打工，月薪1萬，但李星瑭有車有樓，據知李丞責還代支付汽車保養、保險和停車場費，又供胞弟學中醫。兩兄弟近年交惡，據悉主因是李丞責發現胞弟在同一商業大廈經營風水顧問公司，擺明頂爛巿搶生意，有消息指李星瑭情緒有問題，並不聽家人勸喻，事件耐人尋味。
李星瑭：冇搶佢生意
李星瑭昨日接受本報記者電話訪問，他逐點回應指控：「我99年入佢（李丞責）公司打工，01年買車，架車係佢畀晒費用，因為係佢畀我嘅花紅，至於讀中醫嘅費用，我讀咗兩個學位都幾十萬，我係向政府借錢。我05年離職先自組公司，有商業登記，有證有據冇搶佢生意。」問到可覺李丞責為人難相處，李星瑭直言：「呢啲嘢真係人夾人，佢可能係好老公，但在我嚟講，佢就做得唔夠，佢份人凉薄咗少少，唔顧外間人感受，講嘢又粗言穢語，對任何人都唔好受。」
李丞責和李星瑭的兄長、港台高層李再唐卻希望家和萬事興，他昨日在電話中說：「我覺得家事冇必要向外分析咁多，佢哋兩個冇嘢。」
李丞責：擔心佢有病
李丞責昨午反應激動，但晚上7時多在尖沙嘴臨時召開記者會時，他的態度已轉為平和，他直認跟李星瑭沒聯絡四年，他說：「細佬人生經驗淺，佢可能有壓力，有啲事重叠咗，我作為哥哥會原諒佢，我哋之間冇錢銀轇轕。」可是指李星瑭有情緒病？李丞責說：「我絕對擔心佢有呢種病，佢同我印象中嘅細佬好唔同。」
李丞責否認所有負面報道，並指若李星瑭經濟有困難，他必定相助，李丞責說：「我都聯絡唔到佢，好掛住佢，我擔心佢多過自己經濟。唔知細佬係咪幫我，但我就會幫佢，有乜嘢兄弟可以坦白講，佢出聲我一定幫手。」
採訪：比華利、王崇穎
攝影：黃文成
from:
http://hk.apple.nextmedia ... art_id=13670898
