市況變幻無常，沽壓非常大，若打開恒指周線圖，就會發現大市自去年10月中重上22000以來，一直打橫行，家有啲重心下移傾向，形態上慢慢出現一個大圓頂。樂觀看法係累升過萬點後要回氣休息吓，喘定再上26000。就上個月資金情況睇還可以，但自從人行加存款準備金率後，「無私顯見私」出嚟話唔係收緊資金，印度又話要退市、港滙轉弱……小心資金流走，平頂高原變大圓頂回落派貨。
所以喺周末投資講座中，提醒散戶市升要居安思危，小心今年第一季低基數效應下嘅業績假象過後，公司盈利無以為繼，因此投資策略要特別具機動性及防守性。所謂機動性，簡言之係要夠貼市，除咗知道當日焦點風向點變，仲要將同板塊嘅股份用紙筆記低，每當該板塊嘅A股開市出現異動，即刻要留意H股及中資同類股走勢。
方興有望跳彈床
家陣食糊越嚟越難，即使捉啱板塊，都要以無比智慧往上找，搵啲仲未升嘅上游業務綠洲。就以噚日炒上海世博倒數100日為例，正路會諗錦江酒店（2006）、上海實業（363），但市場點會就咁算，結果炒到隻港佳控股（605）。原來港佳喺上海有超市「吉買盛」，同北京嘅便利店「好鄰居」，兩地加埋超過150間分店，計劃發展為全國性超市。
到底世博係咪可以帶旺便利店等超市生意確係非常成疑，但連聯華超市（980）都創新高，咁貴仲有人追，似乎市場忘記咗超市毛利低嘅特性，可見已炒到冇嘢好炒，資金轉炒世博炒春運銷售旺季，仲有百貨股同個別見底回升嘅上海概念內房。
百盛集團（3368）喺內地26個城市，包括上海、西安、重慶、無錫等經營百貨店，走中高檔路線，有啲似香港嘅崇光。呢類百貨公司最賺錢嘅業務係賣禮券卡，係官場職場黑白兩道嘅送禮佳品，所以百貨公司嘅貨品可以賣貴市面兩三成，因為禮券卡有到期日，消費者要趕喺到期前「求其」買啲唔等使嘢。股價跌到殘，要玩就要做好安全措施。至於見底回升嘅內房股仲有方興地產（817）同國家隊嘅保利香港（119），有望食住個勢跳彈床。
胡孟青
如果您喜歡這篇文章，請按「讚」或分享給您的朋友，以示鼓勵。
