拍戲朋友多零舍着數，繼電影《72家租客》曾志偉拍膊頭招攬串星一籮籮之後，多年嚟一直係王家衛御用攝影師嘅夏永康（WingShya）初執導演筒登大銀幕，就拍咗一套青春片《全城熱戀熱辣辣》，套戲喺2月18日上映。班底除咗有謝霆鋒、徐熙媛同Angelababy呢班靚仔靚女演出外，就因為導演同圈中人稔熟，吸引咗唔少不請自來嘅飛來蜢自薦做串星，連膊頭都唔使拍，利是更加唔使封，真係講句無言感激就得。
Rosemary就係其中一個，佢話當佢知道Wing Shya開戲就主動打電話要求演出，仲話：「佢話會加一個性感三點式女郎畀我演，問我介唔介意，我平時喺沙灘都係咁着點會有問題。」當日Rosemary仲出動私伙比堅尼上陣。
另外阿Sa亦喺強烈投訴之後就獲安排客串沙灘美少女，再加兩句對白喎！
至於近日復出拍戲嘅歌神張學友，繼《十月圍城》客串做烈士之後，今次再客串做另一位串星蔡一智嘅司機，都算大才小用咯！難得學友咁大戲癮又樂此不疲喎！
