楊怡昨日大爆跟謝天華拍畢咀戲後，翌日嘴唇即被細菌感染生唇瘡，她笑言要呼籲與她拍咀戲的對手在事前要做好刷牙等「衞生準備」。而被指「帶菌者」的天華聞言即反應甚大：「我好少生痱滋，唔似阿怡咁燥底！」
楊怡及陳茵媺昨日為家品店實惠於太子的旗艦店擔任開幕及剪綵嘉賓。近日頻頻出動搵真銀的楊怡，笑言為搵銀不介意與緋聞男友黎諾懿以情侶檔出席活動，她說：「同邊個拍都冇所謂，有錢搵就得。（同黎諾懿？）照殺！依家話我同佢傳緋聞嘛，拖住出添呀！必要時錫住出都得，但係就要加價！」
正當記者笑指楊怡為酬勞甘願將緋聞「擺上枱」之際，她竟無厘頭自爆前晚為新劇《魚躍在冬季》跟天華拍了一場咀戲，更謂：「我同天華拍完咀戲後，第二日即刻生唇瘡！（天華傳染你？）講笑啫，我拍之前已經有粒瘡，但係可能同佢咀完後畀細菌感染！」
已生痱滋疑似「帶菌者」的天華接受電話訪問，得知楊怡的「指控」時，即謂：「黐線啦！同佢拍嗰陣已經覺得佢好緊張，都唔知點解同我咀要咁緊張，（話你有菌？）拍之前佢已經話生痱滋，佢成日唔夠瞓就梗係會生啦，但係我自己就好少生嘅，我唔似阿怡個人咁燥底！」
途人狂閃另外，天華跟楊怡前晚於尖沙咀碼頭為《魚》劇拍攝咀戲時，吸引逾百人圍觀，期間因市民不時用閃光燈拍照，阻礙拍攝進度，天華謂：「我咪叫啲途人唔好用閃燈影相囉，雖然係有啲阻滯，但都冇影響我哋嘅專業，場咀戲兩、三take就搞掂，因為之前喺北海道已經拍過類似嘅戲份。」
