無綫最近趕拍賀歲劇《情人眼裏高一D》，搵咗出名矮嘅阮小儀同王祖藍搞笑，再拍黃宗澤（Bosco）、徐子珊、苟芸慧。賀歲劇暫定喺年初二播，呢個劇嘅內容有影射呢個圈嘅成份。眾演員噚日喺將軍澳電視城現身，祖藍喺劇入面叫恭因銅，阮小儀叫荊止高，苟芸慧叫楊仙華，而徐子珊飾演嘅謝安腓會同Bosco飾演嘅廑力信同陳山聰演嘅張濟春有感情線。
苟芸慧嚟咗香港7個月，知道自己廣東話唔好，第一次正式拍劇少不免要NG，佢話好彩有前輩黃宗澤同王祖藍教路，但係螢幕初吻就畀咗佢兩個，對住呢兩個完全唔同類型嘅男人，如果畀佢揀，佢話會揀王祖藍喎，佢話：「我鍾意男仔有才華。」靚仔小生黃宗澤竟然輸畀王祖藍，Bosco話：「啱o架！有taste！」
