林志玲近日為有份主演嘅電影《刺陵》四周圍飛，前晚就由北京飛去馬來西亞宣傳。原本佢坐商務機位，行李應該好快清關，但等咗差唔多一個鐘，先見到自己嘅行李同工作人員嘅一齊出現。返到酒店後，先發現行李鎖頭被撬開，唔見咗一隻由佢做形象大使、價值20萬新台幣嘅手錶。
之後林志玲即刻報警同聯絡當地代理，心情仲大受影響，佢噚日話：「前一天在北京檢查沒問題，怎麼到馬來西亞就憑空不見了！有點不開心。」志玲話去過咁多地方都未試過發生類似事件。
不過志玲之後都收拾心情，噚日同周杰倫出席《刺陵》喺大馬舉行嘅記者會，手上面仲戴住隻新錶㖭，相信係當地代理安排。講到喺新片入面經常要同周杰倫對打，志玲話：「我一直下不了手，需要周董（周杰倫）開導我。」周杰倫話如果志玲唔打落去，大家就冇得收工，就係咁佢先至敢真打落去。
周杰倫仲話：「其實蠻痛的，她力氣不小。」周杰倫又話能夠同志玲合作，先覺得自己係個男人，呢番恭維說話都算大嘞。
