以為Angelababy（楊穎）跟陳偉霆（William）打風打唔甩，上週卻忽然傳出Baby在北京偷嗒國產萬人迷黃曉明，二人於北京唱K期間忽然孖住失蹤2小時。
據了解，今年8月Baby於北京工作時透過朋友認識了黃曉明，兩人更連同一班內地富豪及太子黨於北京唱K。知情人更透露仍未與正印William斷纜的Baby，對黃曉明非常嗒糖，事關型男黃曉明除了是內地當紅小生，更坐擁過億人仔身家，加上黃億萬身邊大堆富豪老友，比起香港舞王William呢更高，Baby引到黃曉明起痰，有「錢」途。
一向緋聞多多的黃曉明，繼今年10月於上海夜會跟郭富城傳緋聞的霉芒王秀琳後，最近又爆出早於8月在北京設K局溝Angelababy，孖住唱K期間，更「失蹤」達2小時。
上星期一（30日），Baby出席活動落台時失足仆倒，但名模很快儀態萬千起番身，事後她否認心神恍惚，「我只係睇唔到有兩級樓梯，所以跌低，但我有打底，所以唔算走光。」
房祖名在座
其實最近已有傳Baby跟William分手，上週一Baby出席一聖誕活動時更將William由「好朋友」貶為「朋友」，「我哋一直都係朋友，未拖過手又點分手呢？我根本冇時間拍拖。」同日Baby跟William前後腳出席另一活動，Baby全程心神恍惚，落台時更失足仆低。兩日後爆出跟黃曉明的緋聞，Baby在另一個活動即解話與黃曉明的關係：「我係透過一個朋友嘅聚會識黃曉明，但我哋冇唱過K，唔知點解咁傳。」
但據黃曉明身邊人透露，Baby所講的「聚會」，正是黃最鍾意出席的「富豪局」。身為內地最紅小生、兼身家達億元人仔的黃曉明，原來跟唔少內地富豪及「太子黨」稔熟，他的富豪蒲精名單中更包括同樣多女兼爛玩的龍之子房祖名，知情人說：「佢哋成班人，包括房祖名經常喺內地夜場蒲通宵。而佢身邊有啲友人成日介紹啲model、索女畀佢識，所以黃曉明成日都俾傳媒影到佢同啲索女去玩，佢同Baby就係透過朋友介紹，一齊去咗唱K，不過佢哋冇失蹤兩小時。」
身邊有大堆索女包圍，令黃曉明更受內地富豪歡迎。「佢好慷慨咁介紹靚女friend畀班富豪認識，所以個個鍾意同佢玩。」
唔理Baby
上星期一，William跟Baby出席同一活動，佢唔單只冇跟Baby合照，更心不在焉，見Baby落台時跌倒都無動於衷。
「放手」自白
Baby最近忽然喺佢好耐冇update的Xanga blog內寫了一篇網誌報道近況，更話：「該失去的始終都會失去。」擺明放煙幕，令人估計佢同William已分手。
Avex詐型
Baby冧掂黃曉明，除了有利她進軍內地市場外，更助Baby埋富豪堆。
雖然Baby跟黃曉明玩埋，但她跟William仍未斷纜，早前傳出她計劃跟William於12月秘密註冊結婚後，其日本經理人公司Avex即向Baby詐型。為免影響前途，Baby才跟William扮分手。
做戲做全套，週日William出席活動時，提起Angelababy跟黃曉明的緋聞自然酸溜溜，「係真係假，佢會同大家講佢有權選擇結交朋友……我自己冇時間同任何人相處，但我同佢嘅朋友關係冇改變。」
多女埋身
黃曉明（左下圖右一）身邊經常有一班索女陪蒲陪玩，前年年尾，他便被影到跟內地女星、跟韓國型男權相佑傳過緋聞的李菲兒（左一）密會，更帶對方到他家中過夜。
網上圖片
黐埋祖名
房祖名（左一）是黃曉明的「富豪局」鐵腳之一。10月尾，Baby到日本出席日本時裝節期間，便孖住日本男星中村獅童（中）、東亞老闆林建岳（左二）及房祖名到東京一間燒肉店吃晚飯，Baby仲將相片放上blog，原來Baby同黃曉明老友，同房祖名一樣熟絡，唔怪得黃曉明的富豪局都預Baby一份啦！
億萬小生
32歲黃曉明01年憑內地劇《大漢天子》彈起，據內地傳媒報道，黃現時每部電影約收100萬片酬，劇集每集5萬元，09年代言品牌有6個，代言價約80至100萬。
07年，黃曉明入埋福布斯名人榜，統計每年收入1,100萬人民幣。同年黃簽約經理人公司「華誼兄弟」後持有該公司180萬股，直至週一（7日）股價為$63.75，單係股票價值，黃曉明身家已暴漲至近1億1千5百萬，仲未計黃持有的北京豪宅。靚仔又有錢，唔怪得女星女模都想埋佢身啦！
玩靚車:黃曉明擁有多部名貴跑車，包括一輛價值3百多萬元的藍色法拉利，認真富貴。網上圖片
住得豪:黃曉明位於精英社區的一千多呎高尚住宅，市值約7百多萬人民幣。網上圖片
食女王
入行9年，跟黃曉明傳過緋聞索女大大話話多達十多人，而且位位都係索女名模，人氣勁升的Angelababy簡直啱晒黃曉明胃口。
應采兒
06年拍《鹿鼎記》撻着，黃更被影到帶埋阿媽同應采兒喺北京見家長。
白歆惠
09年10月被影到台北招待會夜蒲。傳二人去年於台灣拍MV《暗戀》時撻着。台灣《蘋果日報》圖片
王秀琳
09年10月，二人上海私會玩通頂，傳二人早喺07年拍《神槍手》時戲假情真攬住唔放。《蘋果日報》圖片
趙薇
北京電影學院同學，黃曉明自爆曾對趙薇一見鍾情並暗戀她達2年。《壹週刊》圖片
鑽石筍盤
國內市場大，唔少小生密密做都搵埋唔少，據內地傳媒計數，不少國產小生一年已執近2千萬，唔怪得咁多人恨做明星啦！
張國立
身家：約2億元
演過《紀曉嵐》的內地演員。他擁有北京逾億元的紫玉山莊超級豪宅，估計身家逾2億元。
陳坤
身家：約2千5百萬
07年福布斯中國名人榜第17位，當年總收入2千5百萬，現時國內小生當中片酬最高，有250萬一部。
劉燁
身家：約1千5百萬
片酬100萬，01年憑《藍宇》奪得有史以來最年輕金馬影帝後狂接戲，08年全年收入1,500萬人民幣。
密揀男裝
上月22日，本刊於銅鑼灣I.T發現Angelababy細心挑選Comme des Garcons男裝副線「Black」系列，Baby更同售貨員講話想買來送畀男仔當聖誕禮物，不過最終都係空手而回。
除咗黃曉明，最近亦傳Baby拍《花田囍事2010》時跟鄭中基撻着。上週三（2日）《花》片記者會，吳君如專登推太子基埋Baby身邊。但據知緋聞實屬流料。
