數數手指，周杰倫、江語晨秘密拍拖眨眼兩年。仲未散？係，我認我心地唔好，因為周董點睇都唔似會為咗一棵樹放棄成個森林，不過，如果女朋友旺夫旺財招財貓託世，另計！
自從將江語晨私有化，咁啱得咁蹺，周董就連續兩年成為台灣樂壇「吸金王」，舊年搵1.7億今年搵1.3億港幣，仲有機會執星爺周星馳二攤，拍攝荷李活巨製《青蜂俠》（The Green Hornet）。
周董唔只錫到燶，兩個連見少陣都驚相思病發。事關有網友發現江語晨响blog入面嘅多張酒店房自拍相，同周董响美國拍西片期間入住嘅酒店房，無論布置陳設都一模一樣。有江語晨人肉速遞到美國，唔怪之得周董拍《青蜂俠》愈拍愈肥，肯定好食好住又好瞓！
周杰倫1.3億
第二年成為「吸金王」，周董主要收入來源係廣告，代言費就有過億港紙落袋，不過最大豐收係拍《青蜂俠》，响美國閉關三個月，周董日日鋸扒當飯食，食出面圓好脂肪。
好老實，22歲嘅江語晨天生面長兼倒扱牙，靚又靚唔過蔡依林，講外形大方又唔及侯佩岑，勝在條命夠旺夫，周董錫佢錫到燶！
周董愈搵愈多，當然唔會待薄女友，去年獲賞賜寶馬名貴房車，之後再送上江語晨生日日期「0429」車牌，夠細心。
自從被周董賞識拍攝電影《不能說的‧秘密》，曾愷玹一直當紅，出書拍劇拍廣告處於上位好狀態，偏偏同二打六吳慷仁打牌撻着，應該令好多電車男跌眼鏡。
等個外賣其實唔使三分鐘，但曾愷玹同吳慷仁好識善用時間，例如隔住口罩錫番啖，等外賣乘機攬一攬，當街當巷都咁親熱，返到屋企咪……
