伍詠薇（伍姑娘）、徐子珊、梁政珏、黃長興同黎諾懿噚日齊集九龍灣宣傳無綫新劇《美麗高解像》，由於齣劇涉及吸毒問題，所以一眾藝員都身體力行宣揚禁毒訊息。不過劇集拍攝時曾經傳過眾女藝員群起杯葛徐子珊，再重提呢件事，徐子珊再次否認，仲即場同伍姑娘有傾有講，打破不和傳聞。徐子珊話拍劇時從來冇俾人蝦，佢話：「我入行之後都冇俾人蝦，可能我後知後覺啦，唔覺得有人針對我。」
伍姑娘話同徐子珊有傾有講，又話不和消息屬流料，佢話：「劇入面我成日都蝦人，不過現實中我唔蝦人！」但估唔到伍姑娘讀書時曾經俾同學蝦，佢話：「試過成14個女仔想圍毆我，我梗係話唔得啦，之後都係一對一打，家諗起都好好笑。」梁政珏照例性感現身，但佢口口聲聲話唔係博搶鏡喎！
