內地靚仔黃曉明前晚去咗台灣，逗留三日兩夜，為嘅係拍新歌兼幫上海世博會主題曲拍MV。佢前晚喺酒店安頓好後，吔咗條蕉，就趕去一間夜店會合台灣敗犬女王楊謹華開工。MV劇情係話佢兩個眉來眼去，但襄王有心，神女無夢，靚仔搭訕，女王請食檸檬。
現場見楊謹華着住件黑色套裝，反而旁邊班臨記小妹妹個個都好性感，楊謹華經理人即刻好識做，趁空檔走去問導演：「要大辣、中辣，還是小辣？」然後佢就帶住楊謹華去換衫。過咗一陣，楊謹華着住件紅色低胸裙出現，32C美胸呼之欲出，但佢好擔心走光，不停整理，加上身旁經理人、女助手出手相助，1對奶上有6對手喺度游走，都幾搞笑，卒之佢哋拍到凌晨3點先收工呀。
