天橋上形象百變的Angelababy（楊穎），拍攝新片時竟二話不說「零脂粉」上陣，被劇組全體稱讚皮膚無瑕疵，令Baby十分開心。飾演工廠妹的她笑謂拍攝過程十分過癮，皆因騎單車上班及坐在衣車前車公仔的場口，令她如置身五、六十年代，新鮮感十足。
Baby在電影《全城熱戀熱辣辣》中的工廠妹造型十分可愛，束起「孖辮」的她配以五、六十年代的簡樸服飾，以及一條工廠妹特有的圍裙，感覺清麗脫俗。不過最特別的，還是Baby的「零脂粉」素顏look，沒化妝的她不但未見走樣，而且還有一份脫俗感，令整個劇組都為之「驚艷」。
怕出粒粒
Baby笑謂：「好彩呢套戲唔使化妝，因為要喺高溫下取景，仲要導演為咗營造熱辣辣感覺，要我哋搽晒油咁上鏡，如果化埋妝，喺油同汗嘅雙重夾擊下，我塊面一定出粒粒！」
除了Baby的素顏得到讚嘆外，她的流利普通話一樣令人喜出望外：「因為套戲全程要講普通話，我本身係上海人，當然冇難度。點知啲工作人員竟然笑我，話我成日喺日本發展，以為我淨係識講日文，連廣東話都唔記得喎，真係畀佢哋激死！」
中正死穴
在戲中經常要與衣車做「對手戲」的Baby，笑謂原來家政堂是她的死穴，為了演好角色，她被迫下苦功練好車功：「我試過做針黹嘅時候拮親隻手，之後就對針有恐懼症喇，為咗克服呢樣嘢，之前特登喺屋企練咗好耐車衫㗎，哈哈！」
