01年奪得亞視女優冠軍入行的李綺雯（o靚妹），自過檔無綫後事業停滯不前，僅獲安排在劇集中做二線角色。不過她的愛情路卻暢通無阻，半年前偷偷搭上效力南華、外號陳七的足球明星陳肇麒，早前兩人靜雞雞到澳門旅遊疑似預支蜜月，看來好事不遠矣。球星配美女，絕對是開心大發現。
現年25歲的李綺雯於01年當選亞視女優冠軍後，曾在亞視主持多個綜藝節目，尤其以俏皮方式報道天氣最令人印象深刻，可惜自06年轉投無綫後，一直工作量不多，早前在蘭桂坊拍攝無綫劇集《談情說案》時更連環吃NG，看似心事重重。
「佢乜嘢都好」
平日話頭醒尾的o靚妹當日心神恍惚，原來事出有因，事關她在愛情路上已找到真命天子。本報連日明查暗訪，發現o靚妹原來正跟效力南華的24歲香港首席射手陳肇麒秘密拍拖，兩人早前結伴到澳門旅遊，情到濃時更拍下激吻照片，羨煞旁人。記者昨日致電向o靚妹求證時，她直認正在蜜運中：「係呀，冇乜嘢特別，我哋啱啱開始冇幾耐，係朋友介紹認識，我最初識佢都唔知佢踢得咁叻。」
據知o靚妹與陳七秘密撻着半年，今年初更相約欣賞本地球賽，而陳肇麒出賽時每有「士哥」，都會在台下大鐘底畫出心形圖案，難怪令o靚妹冧到爆。問o靚妹欣賞男友甚麼優點？她難掩幸福地說：「佢乜嘢都好。」她更表示除了工作，幾乎與男友無所不談。
提到與陳七到澳門旅遊疑似預支蜜月，o靚妹昨日尷尬地說：「唔係呀，咪亂寫，同行仲有好多人。」熱戀中的o靚妹可有帶男友見過媽咪？她說：「屋企人未知，未去到呢個階段。」近日o靚妹曾在網上上載婚紗照，莫非與男友已達談婚論嫁階段？她否認說：「嗰啲係拍廣告造型相。」可有結婚計劃？她說：「都有o架，不過要再睇吓先。」
陳肇麒稍後要到熱刺試腳，問o靚妹可會做跟得女友時，她說：「唔會啦，我都要開新劇。」近日可有為男友炮製愛心餐打氣？她說：「唔使啦，佢哋有特別食物。」可有受男友影響愛上足球？她甜絲絲笑不停說：「都可以咁講。」她坦言拍拖後即熱捧男友効力的球隊。其實o靚妹對足球一向情有獨鍾，06年有指她與霍啟剛一同欣賞世界盃而傳出緋聞，如今搭上香港首席射手，更加可以大條道理一同欣賞球賽了。
人物誌：陳七下月英超試腳
與李綺雯拍拖半年的陳肇麒現年24歲，現效力南華。身高1米87的他能傳擅射，是一名不可多得的前鋒殺手，由於他穿7號波衫，故有「陳七」的稱號。今年英超勁旅熱刺來港迎戰南華，陳七在完場前怒射破網，賽後更獲熱刺邀請他下月赴當地試腳，令他成為首位到英超試腳的香港球員。
此外，今年2月陳七曾被拍得與女伴一起看球賽（圖），沒想到他不久後便投入李綺雯的懷抱。
from:
http://hk.apple.nextmedia.com/te ...462&art_id=13466857
