今年亞洲小姐嘅宣傳活動相當頻密，19位候選佳麗幾乎日日都有活動，噚日一班佳麗又去到尖沙嘴接受泰拳訓練，好多日冇現身嘅2號王希瑤都有出現，佢話早前因為有病，缺席咗好多次活動，噚日仲病緊，未好番晒，佢細細聲話：「醫生話我氣管炎，家每日要打5支針，都打咗兩日，仲有1日要打。我未試過病得咁嚴重，不過我希望可以盡量出席活動。」佢仲自爆其中兩針係打屁股，每日打兩針，容乜易拮到開花。
王希瑤噚日細細聲話自己有病，仲要日日喺屁股打針
噚日大部份佳麗都係第一次打泰拳，所以表現得雞手鴨腳，而3號林紫君就話自己學過1個月泰拳，佢話：「因為都好興打泰拳，所以都學咗成個月，不過因為打到手腳都損晒，所以後尾都冇再學。」不過林紫君嘅上圍咁豐滿，打起上嚟會唔會有阻礙，佢笑笑口話：「我會戴運動bra，所以冇咩特別，我平時都有打開籃球。」同樣身材豐滿嘅台灣代表18號劉伊心噚日仲話特別着咗小可愛內衣（束胸胸圍），佢話：「我特別穿上小可愛把它夾緊，雖然有點辛苦，不過還是可以接受，我之前都未打過泰拳，覺得蠻好玩又可以收手臂。」
