高皓正今日32歲生日，但就要為舞台劇《野玫瑰之戀》做最後綵排，不過同劇演員好有心，噚日佢哋喺灣仔以記者會為名，排戲期間突然由女主角焦媛推咗個蛋糕出嚟，令到高皓正不知所措，之後焦媛又送咗支香水畀壽星仔，強調送香水唔係話對方有體味，叫記者唔好誤會。
高皓正（右）同對手排戲時七情上面，表現唔錯喎。
高皓正好耐之前同任港秀拍過拖，家男方已搵到未婚妻。
明年擺酒高皓正喺台上祝願套劇第3次公演成功，落到台下就好開心同記者講，話已經求婚成功，預計明年初就會同圈外女友拉埋天窗，佢話：「願望係可以快啲結婚，同女朋友都拍咗年幾拖，而且等呢日都好耐，最近至求婚成功。」至於眾所周知嘅女朋友任港秀，佢就好含蓄話都分開咗一段日子，壽星仔又話會喺香港註冊同擺酒。不過《野》劇出年會去馬來西亞同加拿大巡迴，身為老闆嘅焦媛話：「梗係結婚緊要啦，劇團會無限量支持，就佢時間。」焦媛話自己都係啱啱知道呢個消息，都好替佢高興。不過問到幾時輪到焦媛時，佢就耍手擰頭講第二樣嘢。
