已懷孕四個月的郭可盈，心廣體胖，不但升呢做媽咪，上圍還升到C cup。可盈老公林文龍則與她約法三章，要她遵守五大規條，嚴禁她穿高踭鞋、禁上網、禁打機、禁零食和禁動作太快。
身懷六甲的郭可盈，不時開懷大吃，懷孕期間她不但體重上升，連上圍也升到CCup。可盈一向纖瘦，從未試過這樣豐滿，昨日她接受本報記者電話訪問時笑說：「我唔只升呢做媽咪，原來上圍都升cup，懷孕後兩個月已經升到CCup，真係胸大過肚，初時自己都有啲唔慣，所以我考慮餵人奶，而且對BB嘅健康會好啲。」她又表示今次會剖腹產子，老公林文龍也會陪產。
郭可盈為盡義務，稍後就算挺着大肚也會為《富貴門》宣傳。
笑稱BB叫林寶堅尼可盈覺得生仔生女乃上天注定，所以她不會強求，但會花心思改名，她笑說：「我成日有諗啲好有型嘅名，三個字嘅名好普通，兩個字嘅名好型，四個字都唔錯，叫林寶堅尼幾好聽，仔女都合用。」她又謂不少BB用品贊助商聯絡他們，有奶粉、紙尿片和BB衫仔，她已交給經理人公司處理。可盈懷孕後，老公林文龍要她遵守五大禁條，可盈說：「佢唔准我打遊戲機，又唔准我成日對住部電腦，驚有輻射同費神，仲話唔可以着高踭鞋。佢又唔准我啲動作太快，我行街好快，佢成日叫我行慢啲，仲要戒零食，佢唔敢喺我面前食。」她開心地謂文龍一直希望做爸爸，只是她事業心太重，如今才覺得兩夫妻已適齡做父母。現在可盈已開始胎教及做產前運動，有時會在家中播放輕音樂，且為了BB，一向抗拒飲奶類飲品的她現在也會照飲，她說：「我以前好大食，家仲大食，啲口味都轉晒，好鍾意去飲茶食點心，我同文龍兩個人去食點心，可以食10幾碟。」有指可盈產後會退出娛圈，她表示希望工作以輕鬆為主，因為想有自由時間，她也不想受合約束縛，假若有適合工作她也不會抗拒，而無綫台慶劇《富貴門》，她也一定會協助宣傳。
