劉德華近日被踢爆講大話隱瞞已婚成為城中熱話，圈中人也議論紛紛，前晚陳加玲以一身凸點打扮在中環出席adidas派對時，提及華仔事件突然一輪嘴喪鬧，但她鬧的卻是華仔舊愛喻可欣。
喻可欣。
陳加玲前晚甫現身即對記者說：「我近期成日作嘔反胃，呢排睇咗好多關於劉德華前女友喻可欣，好可憐囉！做女人做到佢咁真係好慘，丟晒我哋啲女人架！鬧一個人要由上世紀鬧到今個世紀，使唔使去到咁嚴重呀？」她又指手劃腳說：「男女拍拖唔啱分手係好正常，最頂唔順係佢仲拎啲信物上網拍賣，唔鍾意咪掉咗佢，再唔係咪畀工人囉，好反胃，作嘔，佢應該反省吓自己！」陳加玲和華仔91年曾合作電影《中環英雄》，莫非她是華仔fans？她卻說：「我細個好鍾意喻可欣，點解咁靚女搞到咁？20幾年嚟不斷傷害佢曾經愛過嘅一個男人，佢都唔知乜嘢叫愛，呻足一個世紀。」陳加玲越講越激動：「我喺呢個case幫華仔，全個娛樂圈最欣賞呢個男藝人，我未見過一個咁品貌兼備嘅男人，係排名第一。呢幾日佢好慘，結唔結婚、有太太仔女唔使同第三者交代，背負咁多罪名，你估古代呀？老婆仲慘，啱啱死咗老竇，仲不斷俾人講，佢好堅強，劉德華太太好有品。佢（指劉德華）又孝順父母，盡情盡意，對自己女人咁多年冇變心。」陳加玲早前曾狂插姐夫林國雄是騙財偽君子，又罵其胞姊陳秀雯是非不分，難怪鬧喻可欣更不留情。
陳加玲（圖）前晚飛釘斥喻可欣對劉德華又鬧又呻20多年，言行令人作嘔。
