絲襪奶茶$13、金牌豬扒包$15/個
用上5款茶葉，以毛布袋拉茶4次，配合味道最夾的植脂奶，茶味香醇，質感細嫩順滑。芝麻包烤得脆口，豬扒軟熟，咬入口有肉汁。
屹立中環逾50年的蘭芳園，以招牌撈丁和絲襪奶茶聞名海外，由車仔茶水檔口搬至入舖，今日終於擴展至尖沙嘴開分店。新店選址重慶大廈的活坊，昨日正式開張，成了香港區以外首間分店。食物方面，將舊舖大部份食物都帶過海，必試的絲襪奶茶、葱油撈丁、金牌豬扒包，都可在餐牌上都找到，且味道不變。為了讓新店延續老店的風味，冲製絲襪奶茶的茶葉取自舊店，亦找來舊店的老手師傅坐鎮，創辦人林老先生的傳人業仔亦會落場客串露兩手，保證奶茶的味道跟舊店一樣香滑，有望成為九龍區奶茶迷的新竇口。
新店除具備舊店風味外，亦為九龍區的食客帶來新口味。從來不做晚市的蘭芳園，首次推出扒餐於晚間供應，如羊扒、牛柳、西冷等，雖是新手上場，但水準絕不亞於一般餐廳，定價幾十蚊，大件抵食。另一賣點是裝修，甫入店恍如時光倒流，舖面設有兩道舊式手拉鐵閘，旁邊的招牌以洗水石做，水吧也相當熟口熟面，設計正是沿自當年蘭芳園茶水檔的模樣，還有四周滿是摺凳、瓷磚等大牌檔的記號。
巴西牛柳$78（跟餐湯熱飲）
牛柳醃得入味，燒香後肉質鬆軟，口感鮮嫩，而且多汁。
新西蘭西冷$58
（跟餐湯熱飲）
新西蘭牛肉以雜菜和香草來醃製再燒熟，西冷肉質較厚，口感豐富，牛肉味夠濃郁。
葱油雞扒撈丁（包熱飲）$37
雞扒以香草醃過，燒至皮脆肉香，丁麪用豬骨湯拖過，麪條口感有彈性。
傳統舊式咖央西多士$14
麪包拍上蛋黃後炸香，塗新加坡咖央醬，入口甜蜜，帶啖啖蛋香。
蘭芳園（2316 2311）
尖沙嘴彌敦道36-44號重慶大廈活坊地庫26號舖
[
本帖最後由 mercurywong 於 2009-9-10 09:23 編輯 ]
