繼劉德華、楊千嬅、黎明和關淑怡相繼被踢爆在美國賭城秘密結婚後，現年46歲的苑瓊丹，原來早在5年前已跟拍拖多年的「玻璃大王」黃乃揚在賭城註冊結婚。昨日苑仔接受電話訪問時坦承已婚，但就死撐自己並非玩神秘，只是近幾年無人追問罷了。
早前因為劉德華拒絕給相戀24年的朱麗倩一個名份，結果被本報在美國內華達州克拉克縣一個公共搜尋網中，獨家揭發華仔原來已於去年6月在賭城跟朱麗倩註冊結婚，之後楊千嬅與丁子高、黎明和樂基兒，甚至關淑怡等，也先後在同一個網站中被踢爆秘密結婚，藝人連環被爆婚訊，消息轟動全城。原來，秘密結婚不只一眾天王天后，還有被喻為圈中小富婆的苑瓊丹。
記者昨日在克拉克縣同一個搜尋網中，發現原名苑麗瓊的苑仔，於04年7月11日以Yuen Lai King名字跟Wong Nai Yueng Noel在賭城註冊，二人到埗通知日期也是同一日。至於苑仔丈夫黃乃揚的家族經營玻璃生意，資產總值接近3,000萬。
記者昨日就秘密結婚一事向苑仔求證，她笑說：「我唔係保持神秘，係近幾年冇人問我啫，個個老友都知我結咗婚啦。我呢啲係筍盤，市面好渴求，真係手快有手慢冇。」
老公身家數千萬，苑仔豈非可以叠埋心水減少工作專心做闊太？苑仔說：「我同老公有工作狂，唔鍾意嘆世界。雖然我同老公各有各忙，大家成日飛，唔係經常喺香港，但小別勝新婚吖嘛。」
問到為何選擇在賭城註冊？苑仔說：「嗰次我去登台，咪順便結埋，快靚正，我哋喺香港買定結婚戒指，嗰日我着得好casual，鮮紅色T恤襯牛仔褲，冇人觀禮。」
問到可有生兒育女大計？苑仔說：「我幾十歲，係超級高齡產婦，唔諗呢啲啦。我啱啱過咗結婚周年紀念，嗰日老公打電話約我食飯，我先記得係結婚5周年，但當日自己好冇情趣，因為有嘢做而推咗佢，話遲兩日至食。其實我同佢唔係時下後生仔女嗰啲激情，係昇華級夫婦，日日對我哋嚟講都係新婚。」
[
本帖最後由 mercurywong 於 2009-9-9 10:18 編輯 ]
