林海峰（Jan）一向腦筋都轉得好快，近日天王天后被爆結婚，佢當然緊貼潮流講吓呢啲熱辣辣嘅新聞。噚日Jan出席喺銅鑼灣舉行嘅「麥當勞叔叔之家慈善基金日」活動，講到娛圈喜事重重，咁啱Jan嚟緊個talk騷就快開鑼，問佢會唔會借題發揮呢？Jan笑笑口話：「真係好感激呢幾位藝人，幫我個騷《是但噏我願意》做宣傳，估唔到佢哋會咁配合我，我想邀請佢哋嚟我個騷，等我幫佢哋做證婚人，舉行神級嘅婚禮，佢哋可以接受觀眾嘅祝福。」
近來娛樂圈爆出好多單秘密結婚嘅新聞，真係益晒林海峰個騷有大把嘢噏。
對於外界批評藝人其實係偽人，成日講大話，Jan話：「始終結婚都係佢哋嘅事，從事呢行都係七分真實三分幻想，有時可能會係三分真實七分幻想。」另外關淑怡都畀本報踢爆24年前秘密喺賭城結婚，問Jan有乜嘢睇法？佢話：「咁佢保持得好好呀，關淑怡一向有佢嘅生活模式，唔會咁易受人影響，有乜都會繼續佢自己嘅風格。」
