35歲的新一代扮嘢王李思捷，早前與年僅18歲的「美味天使」春卷（王寶寶）拍拖睇戲斷正，雖然事後春卷聲稱二人只是朋友，但日前記者又咁啱得咁蹺撞正二人到銅鑼灣行街街，春卷充當李思捷服裝指導幫男方揀衫之餘，更做阿四幫李思捷攞衫，認真體貼。
李思捷今年初與落選港姐葉凱茵甩拖後，於兩個多月前與春卷撻着，二人本月初在圓方睇戲被本報記者撞到正。雖然事後春卷否認與李思捷拍拖，但就承認很欣賞他，並表示不介意男友年齡大自己一截，明顯勁冧李思捷。
揀得仔細猛咁照上周五下午4時許，記者又碰見一身便服打扮的李思捷和春卷到銅鑼灣行街街，二人先到京士頓街的意大利休閒服品牌Gas睇衫，春卷一入舖頭後即為李思捷揀衫，然後拿起一件紅色T恤拼在男方身上。李思捷接過T恤後又在自己身上左拼右拼，由於店舖內光線較暗，李思捷索性拿起T恤對住射燈再照清楚，揀得十分仔細，最後李思捷聽取春卷意見扑槌購買。在李思捷付款期間，春卷邊睇雜誌邊說：「呢啲啱你，呢啲好睇。」莫非春卷還做埋李思捷的私人形象指導？
購物後春卷為李思捷攞住兩袋戰利品，而李思捷則如大爺般雙手放在背後走出店舖。
李思捷拿着紙袋與春卷離開Gas後，再往附近的adidas Originals ConceptStore睇衫，春卷一入舖頭後即忙於幫李思捷揀外套和T恤，最後李思捷又掃了一袋離開。不過，離開時竟見春卷幫李思捷攞衫，而李思捷則如大爺般大搖大擺步出舖頭，雖然春卷如做阿四，但束起馬尾的她還邊行邊蹦蹦跳，心情靚絕。記者昨日致電春卷時，她承認與李思捷行街買衫，但就繼續否認拍拖：「嗰日我喺灣仔嗰頭，佢喺附近拍嘢，有幾個鐘頭休息，但唔想返屋企，咪約埋一齊睇衫囉。」
春卷不但青春逼人，原來更是個體貼女友。
