o靚模喺動漫節繼續鬥性感，o靚模形象再次插水，搞到唔少model都要同o靚模劃清界線。好似諸葛梓岐咁，上月尾FBI喺一個首映撞到佢，FBI就見佢唔多願意企埋Lavina（鍾蕙芝）、Rainbow（胡心諾）等o靚模身邊喇！咁都未止，諸葛仲話自己接受唔到好似其他o靚模咁出比堅尼人形攬枕，「見到啲人揸住（攬枕）喺重要部位，真係接受唔到。」另外，今年嘅「Tokyo GirlsCollection」將會喺9月5號於東京六本木舉行，諸葛梓岐好興奮咁同FBI講：「落實咗我會行呢個騷，呢個係我喺日本嘅第一份工作，係我日本嘅經理人公司（K Dash，中島美嘉亦都係屬於呢間經理人公司）幫我傾返嚟。」
講開今次「Tokyo GirlsCollection」，年初已成功攻日嘅Angelababy（楊穎）亦有份行天橋，佢經理人Kim同FBI講：「其實上次（3月）嘅「TokyoGirlsCollection」已經搵Baby，可惜當時佢冇期做唔到。」而諸葛梓岐亦同FBI講話知道Baby有份行騷，仲話到時會約埋佢去食飯行街。至於上次有份行天橋嘅Kama（羅凱珊）又點呢？唔好意思，出局！
咪埋身 喺首映度，升咗呢啲諸葛打完招呼就想轉頭走，被記者要求同Rainbow（右）、Lavina（右二）同Yuna（左二）等o靚模合照。Rainbow眼睥睥唔妥到出面，惟獨Lavina識做，同諸葛講拜拜。
諸葛被記者要求同o靚模合照後，好唔自然咁撥頭髮，然後好尷尬咁同佢哋吹咗幾句水，未至於即刻鬆人咁冇禮貌。
密會日本通 本月22日諸葛梓岐同「日本通」王友良喺ifc傾密偈，不過諸葛話今次成功攻日，唔係王友良功勞喎。
攞禮物 上週四，日本名師Tsumori Chisato來港開騷，諸葛都有被邀出席做嘉賓，開騷後諸葛即去銅鑼灣Tsumori攞靚衫作為酬勞。
喺「Tokyo Girls Collection」官網中，Angelababy同諸葛梓岐都榜上有名，將會同佐佐木希等人氣模同場，但Baby張相下面有個心形圖案，click入去可睇到佢過往做model戰績，諸葛就得張相囉。
Angelababy開始活躍日本社交界，最近佢就出席東京一派對，仲同女優鈴木亞美合照。（網上圖片）
Out 今年3月Kama（右）都有份行「Tokyo Girls Collection」，但去到秋季就被大會叮走咗。
撐男友 上星期三（29日）Angelababy高調撐William場，出席「拉闊音樂擂台」，喺台下舉住「William」牌扮fans，一於去日本前派定心丸畀男友。《蘋果日報》圖片
女友去日本搵食，男友William亦唔弱，聯同狄易達搞咗場音樂會，仲赤裸上身同dancer跳辣身舞。《蘋果日報》圖片
